Instrumentum donationis diversorum bonorum factae per Iacomellum Clerici Marie Fregie fratri Bonaparti, priori loci fratrum Eremitarum S. Augustini de Eugubio

[1251]

 

Archivio Commun. Eugub., busta 55, pergamena originale

 

 

 

In nomine Christi. Amen. Anno Domini Millesimo ducentesimo quinquagesimo primo, Indictione nona, Eugubii, tempore dni. Innocentii Pape quarti et vacante imperio, ut dicitur, die undecimo intrante mense Iunii. Iacomellus Clerici Marie Fregie de Eugubio, libera et spontanea sua bona voluntate, titulo donationis, irrevocabiliter, inter vivos et pro redemptione anime sue ac parentum suorum, dedit, cessit atque donavit et obtulit fratri Bonaparti, priori sive guardiano loci S.ti Augustini de Eugubio, ac fratri Accurimhomo, eiusdem loci, et cuilibet eorum, insolidum, recipientibus nomine dicti loci, in aptationem et constructionem dicti loci, unam domum positam in civitate Eugubii, in vico Camerarium. Fines domus hii sunt: a primo, platea Communis; a secundo latere, Latinus Todeski; a tertio, Gregorius Troni; et a quarto, Carbonarium Communis; cum uno scrineo, una arca magna et dogamine unius vegetis magne, et cum omnibus aliis massariis seu suppellectibus existentibus in dicta domo. Et unam vineam positam in plano Eugubii, in vectorina: a primo latere, via; a secundo, Mercutius Cartolarius; a tertio, res Monasterii S.ti Petri de Eugubio, et a quarto, Iacobus Calçolarius. Et unum campum positum in villa Marçalle: a primo latere, Iohannes Clerici; a secundo, Fredericus d.ne Capate; a tertio, Bentivenga Bernardelli de Narçalla; et a quarto Bonacursus Philippi.

Et unam silvam coniunctam cum una petia terre, positam in villa S.ti Apolenaris. Fines silve et terre: a duobus lateribus, filii Benvegnatis de villa S.ti Apolenaris; et a tertio, Mercatus Rainerii Piconis. Et medietatem unius pecie terre, pro indiviso cum Arcolano Ruberti, in asio S.te Margarite a capite Faucis. Fines totiuis: a duobus lateribus, Bonaiunta Iohannis, et a tertio, via; vel siquos alios fines habent predicte res; cum omnibus suis pertinentiis; cum introitibus et exitibus suis, et cum omni eo, quod super se vel infra se habent vel habere videntur, in integrum, et cum omni jure et actione, usu seu requisitione, quod et quam (sic) habuit vel habet ipse Iacomellus, vel eius parentes habuerunt, et omnia alia, que reperirentur fuisse dicti Iacobelli et dicti sui patris Clerici, mobilia et immobilia, corporalia et incorporalia, tempore presentis contractus; ad habendum, tenendum ac possidendum et quicquid inde dictis fratribus modo in dicto loco consistentibus, vel aliis ibidem pro tempore permansuris, nomine dicti loci recipientibus, et pro utilitate loci predicti deinceps placuerit perpetuo faciendum, transferendo dominium dictarum rerum in locum predictum. Quas res omnes supradictas dictus Iacomellus constituit se, nomine predictorum fratrum et loci predicti, precario possidere, donec Sindicus predicti loci pro dicto loco predictarum rerum possessionem et apprehensionem intraverit, sive apprehenderit, corporalem. In quam intrandi, sive apprehendendi, licentiam et liberam potestatem dictus Iacomellus Sindico dicti loci, sua auctoritate concessit, quandocunque et qualitercunque voluerit dictus Sindicus, absque omni contradictione sua vel alterius pro eo. Quam donationem, cessionem atque oblationem ratam et firmam habere et tenere promisit et non contravenire aliqua occasione vel exceptione.

Cedendo et mandando omne jus, quod haberet, vel habuit, in rebus predictis in predictos fratres, recipientes, nomine dicti loci, et in locum predictum. Item dedit, cessit atque mandavit omne jus, omnemque actionem, utilem et directam, generalem et specialem, quod et quam habet et habuit adversus Germanum d.ni Petri, nomine et occasione quatuor librarum Ravennatensium et Anconitanarum predictis fratribus, recipientibus nomine dicti loci; quos denarios dictus Germanus eidem Iacomello dare tenebatur; et omne jus, omnemque actionem, quod et quam haberet aversus aliquos homines vel aliquas personas, ex quacunque causa. Que omnia et singula supra dicta dictus Iacomellus predictis fratribus, recipientibus nomine dicti loci, legitime et solemniter stipulantibus, promisit defendere et guarentare ab omni persona, omnique loco, in Curia et extra, jure et usu, omnibus suis pignoribus et expensis, avocatis, salariis et recoltis, sub pena dupli dictarum rerum, ab ipso predictis fratribus solempniter promissa; qua soluta vel non, rato manente contractu.

Et promisit et corporali iuramento asseruit se nemini dedisse nec concessisse ius aliquando in predictis rebus vel aliquid predictorum. Que omnia et singula supradicta, tactis corporaliter sacrosanctis evangeliis, juravit firma habere et tenere et perpetualiter observare et non contravenire aliqua occasione. Hoc addito, quod dicti fratres teneantur et possint de supradictis rebus dare et solvere Dialte de Ciccho Collis Pergule centum solidos bonorum denariorum ravennatensium et anconitanorum, tali conditione adiecta; si ipsa voluerit facere penitentiam et continentiam gerere; et Francisco Brunecte de Burgo S.ti Angeli satisfacere viginti solidos bonorum denariorum ravennatensium et anconitanorum; quos denarios d.na Margarita, mater dicti Iacomelli, eidem Francisco reliquid pro anima sua; et fratri Iovanni de Sancto Vito de Ravegnana dare et solvere, pro anima ipsius Iacomelli et parentum suorum, viginti solidos bonorum denariorum ravennatensium et anconitanorum; et fratri Accurimbono de Cingulo, viginti solidos ravennatenses et anconitanos pro necessitate ipsius fratris Accurimboni; et fratri Iohanni de Mutignano XX solidos ravennatenses et anconitanos; fratris Benvenuto de Cingulo, decem solidos et fratri Bondi quinque solidos ravennatenses et anconitanos pro subcellaribus [=subtalaribus]; fratri Biniparti quinque solidos; fratri Benvenuto de Monte Cosero quinque solidos pro eadem causa; et quod teneantur dicto Iacomello Clerici et Iacomello Rainaldi Martinoççi et Deodato Privingno Paganelli Guarnelaria, si dictus Deodatus voluerit se dicto Ordini dedicare, predicti fratres facere de predictis rebus facere vestimenta convenientia fratribus sub predicta regula constitutis. Que omnia et singula supradicta possint et teneantur dictus frater Bonaparte et frater Accurimbonus facere de predictis rebus, vendendo et alienando de supradictis rebus; ita quod superius dicta possint integraliter adimpleri.

Actum est hoc in loco S.ti Augustini de Eugubio, presentibus domino Deotaiute Peri, Cavalutio Brunelli, Bentevenga Iacobo Iacobi Gualterii et Maximiano domini Deotaiuti, qui huius rei rogati testes interfuerunt ac fuerunt.

Ego Mercatus Rainaldi, Imperiali auctoritate notarius hiis omnibus interfui et, ut supra legitur, rogatus scripsi et autenticavi atque complevi et meum signum * apposui.