Concessio in emphiteusim vineae praedictae

[1263]

 

Codice Eugubino, fol. 22v-23v

 

 

 

In Nomine Christi. Amen. Anno Domini Millesimo ducentesimo LXIII, tempore Urbani Pape quarti, Indictione VI, die XIIII intrante novembre. Dompnus Petrus, Abbas Monasterii S.ti Petri de Eugubio cum consensu et voluntate suorum confratrum, scilicet: domini Bartoli, prioris, domini Venture, domini Viviani, domini Iacobi, dom.ni Petri, domini Iacobi Bonamati Recoli, domini Iunte, post contractum syndicatus solemniter celebratum, nomine dicti Monasterii, dedit et concessit, iure vero emphiteosim, Florense Petri, Syndico seu procuratori fratrum loci S.ti Augustini de Eugubio, syndicario nomine predictorum et dicti loci recipiendi, hinc ad nonaginta novem annos, totum terenum vineatum et invineatum positum in pede montis, in plagia montis Choreggi, fines cuius sunt etc.; infra hos fines, vel siquos fines habet, cum introitibus et exitibus, suisque pertinentiis omnibus, ad habendum, tenendum, possidendum, meliorandum et non alienandum ad daminitatem Monasterii dicti et possessionis, quam dicti fratres habent de dicto tereno, dictus Abbas eidem syndico ipsorum, sindicario nomine recipienti, confirmavit. Confitendo tamen idem syndicus ipsarum rerum proprietatem esse Monasterii dicti, promictens dictus Abbas per se, suosque successores dicto syndico, syndicario nomine predictorum et dicti loci recipienti, dictam concessionem et omnia et singula supradicta firma et rata habere atque tenere hinc ad dictum tempus, nec in aliquo contravenire; immo ipsum terenum ab omni persona et loco legitime defendere et guarentare iure et usu.

Quam quidem concessionem dictus Abbas fecit eidem Syndico, quia dictus Syndicus, syndicario nomine dictorum fratrum et ipsius loci, fratribus presentibus, promisit supradicto Abbati, pro se, suisque successoribus stipulanti, annuatim dare et solvere pro dictis rebus, nomine pensionis, in vigilia S.ti Petri, novem brachia bone candele nove, et, si contingeret quod dicti fratres acquirerent a Bonavita Laurentii Bentevollio Siverii, filiis Tomassi Iacobi, filiis Martini Blance, filiis Symonis Germani et a Bone Engrande, dictum terenum acquisitum habeant, teneant et possideant sub eadem conditione pro eadem pensione.

Quam pensionem idem Syndicus annuatim, die predicta, dictoAbbati dare et solvere promisit, ut dictum est supra, et dicto tempore finito, Abbas et conventus dicti Monasterii, qui pro tempore erunt, teneantur et debeant renovare contractum emphiteosis hoc ordine et tali condictioni sindico, seu priori dicti loci, qui pro tempore fuerit, dicto Abbate et conventu a predictis fratribus, vel ab ipsorum Syndico, primitus requisitis. Que igitur omnia et singula supradicta inter se ad invicem stipulantes, promisit alter alteri adtendere et observare, nec in aliquo contravenire, sub pena dupli dictarum rerum, inter se vicissim solemni stipulatione promissa; qua soluta vel non, rato manente contractu etc.

Actum est hoc in Civitate Eugubii in claustro Monasterii dicti, presentibus testibus domino Iacobo Bonbaronis, Petrutio Bonacursi, Uguictione Corboli, Iacobo Raynerii et Bernardo Notario.

Et Ego Angelus Ugolini notarius, predictis omnibus interfui, rogatus scripsi et autenticavi.