Donatio terreni facta Conventui a Bove Engerrade

[1269]

 

Codice Eugubino, fol. 28

 

 

 

In Christi Nomine. Amen. Anno Domini Millesimo ducentesimo sexagesimo nono, Indictione XIII, Sede Apostolica vacante, die X intrante mense Iulii, Eugubii. Ego quidem, in Dei nomine, Bove Engerrade, per me, meosque heredes, do, trado atque concedo, pro anima mea, meorumque parentum, nomine donationis irrevocabiliter inter vivos, tibi fratri Deodato, priori locho (sic) S.ti Augustini de Eugubio, nomine dicti loci recipienti, unam Tabulam et dimidiam terreni positi iuxta flumen Cavarelli, fines cuius: a primo, flumen; a secundo, res dicti loci; a tertio, filii Symonis Germani; a quarto, filii Accuroli, vel siqui alii sunt fines, cum introitu et exitu suo, et cum omnibus suis pertinentibus, ad habendum, tenendum ac possidendum et quicquid tibi et tuis successoribus et nomine dicti loci placuerit faciendum. Constituens me tuo nomine precario possidere etc.

Actum est hoc Eugubii, in loco S.ti Augustini dicti, presentibus Bentevollio Siverii, Iunta Clare, Bentevenne Bartoli, qui huius rei rogati sunt testes.

Et Ego Bernardus, Imperialis aule notarius, hiis omnibus interfui et, ut supra legitur, rogatus scripsi et publicavi et meum signum apposui.