Littera fratris Pauli, Ord. Eremitarum S. Augustini Generalis Prioris vices gerentis, qua fratri Vitali de Eugubio committitur S.tae Cruciatae praedicatio per civitates et terras Ducatus Spoletani Archiv.

[1291]

 

Communis Eugubii, busta 60, orig. perg., sine data nec subscriptione, at cum a tergo quodam vestigio sigilli in cera rubea

 

 

 

Fr. Paulus, Prior provincialis Romane provincie fratrum heremitarum Ordinis Sti. Augustini et nunc in toto dicto Ordine Generalis Prioris vice gerens. Religioso viro fratri Vitali de Eugubio, salutem in eo qui est omnium vera salus. Cum nobis et triginta fratribus a Sede Apostolica sit iniunctum, quod universaliter citra mare, preter Regna Sicilie et Ungarie, Boemie et partes Polonie, ubi, secundum statuta Curie, crux debet minime predicari, salutifere crucis negotium debeamus publice proponere efficaciter, viriliter et aperte; de vestra provida circunspectione et fidelitate confisi, vobis predicta auctoritate committimus, ut per civitates et terras alias tantum provincie ducatus Spoleti crucem, ad ipsius Terre Sancte subsidium, donec nobis videbitur, predicetis etc. Auctor huius litterae fuit abs dubio R.mus P. Paulus Perusinus, Vicarius seu Rector Generalis Ordinis post obitum B. Clementis de S. Elpidio, qui eam scribere debuit probabilissime an. 1291 in mense augusti. Bulla ad praedicandum vivificae crucis mysterium, de qua in ipsa fit sermo, data fuit a Papa Nicolao IV die 1 augusti anni praefati. Pro Provincia Romana idem R.mus Pater, elegit in praedicatoribus S. Crucis fratrem Ioannem de Tuderto, tunc Priorem Viterbiensem, et fratrem Petrum de Corneto, Visitatorem tunc Provinciae Romanae et Procuratorem, in Capitulo ipsius Provinciae seu Congregatione celebrata die 29 septembris an. 1291 (cfr. Analecta Augustiniana, vol. II, pag. 323).

De Fr. Vitali de Eugubio nullam inveni notitiam in nostris auctoribus.