Oblatio dominae Drudae Jacobi

[3 dicembre 1293]

 

Ex origin. in chart. perg., existenti in Archivo Communis Eugubii, Busta n. 55 Documentum de quo agitur non est originale, sed copia facta an. 1356 a Not. Nutio Iacobi Bernalducii. A tergo, manu antiqua, scriptum est: "Sororum de Sassorevello de Cantiano, oblatarum Ordinis". De hoc Oblatarum monasterio nullam inveni mentionem in Historiographis nostris.

 

 

 

In nomine Christi. Amen. Anno Domini Millesimo CC LXXXX III, Apostolica Sede pastore vacante, Indictione VI, die tertia mensis decembris.

Domina Druda Iacobi, uxor olim Mantie Fortis, volens adherere vite contemplative obtulit se in conversam et familiarem ecclesie, sive loci, Sti. Augustini de Eugubio et bona sua obtulit dicte ecclesie, sive loco, pro redemptione anime sue, viri et filii sui, suorumque parentum. Et predicta fecit et obtulit Deo et beato Augustino et fratri Deodato, priori dicte ecclesie, sive loci, recipienti vice et nomine dicti loci. Qui prior, cum voluntate Capituli dicti loci, scilicet, fratris Johannis domini Ranutii, fratris Iohannis de Narnia, fratris Andree de Castello, fratris Iacobi, fratris Petri (1), fratris Ricardi, fratris Angeli, fratris Marci, fratris Christiani, fratris Andree de Eugubio, fratris Angeli de Fulginio (2), fratris Andree de Fulginio, fratris Deotesalvi, fratris Thadei et fratris Matioli, ibidem ad Capitulum congregatorum, et dicti fratres et Capitulum universum de voluntate dicti Prioris, dictam dominam receperunt in conversam et familiarem dicte ecclesie, sive loci, et receperunt ad obedientiam et reverentiam eandem et loci stabilitatem, admittentes ipsam dominam Drudam ad omnia et singula beneficia dicte ecclesie, sive loci, que competunt et in futurum competere possunt alicui ex conversis dicte ecclesie, sive loci; promictentes in fide inter se viciscim (sic) ad invicem, stipulantes omnia et singula supradicta atendere (sic) et observare et firma et rata habere et tenere et in nulla contrafacere vel venire.

Actum est hoc in sacristia dicti loci, presentibus Bencevenne Suppolini, Conduccolo Venture, Ranutio Brunelli et Bartolo Iohannis, testibus rogatis et vocatis.

Et Ego Massellus Iacobi, Imperiali auctoritate notarius, predictis omnibus interfui, rogatus scripsi auctoricavi et meum signum apposui (3).

 

 

(1) Frater hic verisimiliter est Fr. Petrus de Eugubio, qui nunc inter Beatos in Ordine colitur. Si vere sic est, in eo quod ad Beati Petri biographiam spectat, magni momenti erit documentum istud, et etiam doc. 1283, iun. 17, p. 4, utpote unica coaeva ad nos perventa, in quibus eius mentio fiat.

(2) Contra universorum sententiam scriptorum Ordinis, qui obitum B. Angeli de Fulginio assignabant ad annum 1286, in processu facto pro eius beatifìcatione anno 1890 praevaluit sententia Lud. Iacobilli, qui, in opere "Vite dei Santi e Beati dell'Umbria", nonnullis documentis suffultus, ipsum obiisse asserit anno 1312. Fr. Angelus de Fulginio hic nominatus eritne B. Angelus? Improbabile mihi non videtur, nam, etsi ex testimonio omnium scriptorum, prioratu conventus Montefalchi finito, B. Angelus ad conventum Fulginantensem rediit et ibi usque ad eius mortem permansit, certum tamen est nullum ex praedictis scriptoribus definisse tempus, quo B. Angelus a Montefalco recessit et in patriam se restituit. Iacobilli Montefalchi quoddam instrumentum vidit, ex quo colligitur B. Angelum priorem esse conventus illius terrae anno 1292. At quid postea de ipso fuit? Rediit hoc anno vel sequenti Fulginium? Ubi ille erat anno 1293? Nemo dicit.

(3) In Archivo Comunali Eugubino, Busta 59, invenitur etiam testamentum factum a Deotaiuti Guispoli sub die 27 iulii 1336, in quo sequens reperitur clausula verbum faciens de quadam d.na Druda, sive Soror Ursula, quae forsan est nostra Druda: "Item d.nam Drudam, sive Sororem Ursulam, Recarceratam carceris de Saxorevello (*), in triginta quinque libr. den., quos sibi dedit tempore introitus dicti carceris, et in quinque libr. den. dandis eidem pro suis necessariis, sibi heredem instituit". Actum in ecclesia S. Nicholai de Eugubio, presentibus etc. Not. Putius Stantioli.