Actum professionis Fr. Andrioli Gilii Pulcis

[1297]

 

Cod. Eugub., fol. 52v-53

 

 

 

In nomine Christi. Amen. Anno Domini Millesimo ducentesimno nonagesimo VII, tempore d.ni Bonifacii Pape octavi, Indictione X. Constitutus frater Andriolus, filius quondam Gilii Pulcis de Eugubio, in presentia Religiosi et Reverendi viri fratris Ambrosii, prioris loci S.ti Augustini, ad laudem et reverentiam Dey omnipotentis et Ihesu Christi et Beate Marie, Matri eius, pro salute anime sue et remissione omnium peccatorum suorum, predicto priori, recipienti vice et nomine Prioris generalis Ordinis Sti. Augustini, promisit obedientiam et vivere sine proprio et in castitate secundum Regulam (1) Beati Augustini usque ad mortem. Quam professionem fecit in hec verba: Ego frater Andriolus facio professionem et promicto obedientiam Deo omnipotenti et Beate Marie Virgini et tibi fratri Anbrogio, priori loci predicti de Eugubio, vice fratris Symonis, prioris generalis fratrum heremitarum Ordinis beati Augustini, et successorum eius, secundum Regulam Beati Augustini usque ad mortem (2). Et dictus prior ad obsculum (sic) pacis eum recepit, ipsumque de voluntate ipsius Capituli eum incorporavit Ordini antedicto, vestesque benedixit, ipsumque vestibus benedictis induit, ut moris est in Ordine prelibato.

Acta, facta et gesta sunt praedicta in capitulo loci predicti, die VIIII mensis septembris, in capitulo loci predicti S.ti Augustini de Eugubio, presentibus testibus fratre Pacifico, lectore, fratre Angelo de Fulgineo, fratre Luce et fratre Benigno de Eugubio et aliis pluribus testibus in capitulo congregati (sic).

Ego Bartolus Gholfoni de Eugubio, Imperiali auctoritate notarius, predictis interfui rogatus de consensu et voluntate supradicte partes (sic) scripsi et publicavi.

 

 

 

(1) Vocabulum "secundum", forma abbreviata, scriptum est in fine fol. 52v; et fol. 53 incipit cum eodem vocabulo integre descripto. Errasse scriptorem iudico, ideoque vocabulum "secundum", repetitum vocabulo "Regulam" substituo, quod indubitanter in originali erat.

(2) Post verba "successorum eius" scriptorem omisisse credo per errorem quae secuntur: "et vivere in castitate, sine proprio", necessaria ad plenum clausulae sensum.