Mandatum procurationis

[27 giugno 1304]

 

Ex Cod. Eugub., fol. 33. Instrumentum originale asservatur in Arch. Commun. Eugubini, Busta 58, at membrana adeo est multis in locis lacera et corrosa, quod eius lectura pluries impossibilis evadit. Circa nomina fratrum, quorum aliqua legere non valui, notatu dignum censeo quod Frater qui in Codice appellatur "Rigotii Suppolini", in originali dicitur "Rigonis" et Fr. "Andreas Boniovannis" appellatur "Thomas"

 

 

 

In Nomine Christi. Amen. Anno Domini Millesimo Trecentesimo quarto, Indictione secunda, tempore d.ni Benedicti Pape undecimi, die XXVII mensis iunii. Conventu loci fratrum S.ti Augustini de Eugubio ad sonum campanelle more solito congregato in Claustro loci predicti. In quo quidem Religiosus vir frater Augustinus, prior loci prelibati, cum voluntate et consensu fratrum ipsius loci, videlicet: fratris Iohannis d.ni Raynutii, fratris Petri Bonacursi, fratris Rigotii Suppolini, fratris Andree Boniovannis, fratris Angeli de Germanis, fratris Bartoli Putii, fratris Tudini, fratris Federigi d.ni Ranerii, fratris Ruberti de Terensis, fratris Cambii de Germanis, fratris Georgii, fratris Deotesalvi, fratris Ghabriutii Marcutii, et ipsi fratres una cum dicto priore, fecerunt, constituerunt et ordinaverunt Religiosum virum fratrem Bernardum Mariani, eiusdem Ordinis et loci, ibi presentem, eorum et dicti loci verum et legitimum syndicum et procuratorem, eorum et dicti loci verum et legitimum syndicum et procuratorem, actorem et numptium specialem ad petendum et recipiendum in emphiteusim in dictos fratres et in eorum successores et locum, hinc ad viginti novem annos complendos, ab Abbate et conventu Monasterii Sti. Petri de Eugubio unam vineam cum oliveto, positam in monte ghoregii, qui alias dicitur mons S.ti Augustini, fines cuius: a primo, via; a secundo, via et res dicti loci Sti. Augustini; a tertio, res dicti loci S.ti Augustini, et a quarto res dicti Monasterii Sti. Petri, vel siquos alios fines habet, cum introitibus et exitibus suis, suisque omnibus pertinentiis, ad habendum, tenendum, possidendum, meliorandum, sed non alienandum nec permutandum, nec alicui parti cap. ponendum ad dampnationem dicti Monasterii, et ad recipiendum ab ipso Abbate confirmationem possessionis, quam dicti prior et fratres habuerunt de dicta re, et ad confitendum proprium ipsius rey esse dicti Monasterii et ipsam rem pro ipso Monasterio, jure emphiteusim, possidere promictendum, et ad promictendum renovare predictum instrumentum emphiteusis in hac eadem forma in fine dicti temporis, et ad promictendum dare et solvere pro ipsa renovatione facienda octo libr. bonorum den. Rav. et Anconit. Et eandem promissionem renovationis dicti instrumenti faciendam a dicto Abbate pro dicta quantitate pecunie recipiendum. Et ad recipiendum promissionem a dicto Abbate de legitima defensione facienda ipsius rey, jure et usu et ad promictendum eidem Abbati et successoribus suis pro pensione ipsius rey dare et solvere annuatim in festo Sti. Petri de junio, sine gravamine comestionis, unum brachium candele ad modum aliarum candelarum, quas dicto Monasterio dicti fratres dare tenentur, et ad dandum et solvendum dicto Abbati, vel eius Camerario, pro dicta refirmatione facienda Centum sol. bonor. den. Rav. et Ancon. Et generaliter ad omnia et singula, nomine quo supra, promictenda et stipulanda etc.

Actum est prope Eugubium, in claustro loci Sti. Augustini, presentibus Andrea Margarite, Cola Orlandutii et Venutello Benencase, testibus.

Et Ego Angelus Iohannis, Imperiali auctoritate notarius, predictis omnibus interfui rogatus, scripssi et publicavi et meum singnum apposui.