Oblatio et professio fratris Nicolelli Accomandutii

[28 giugno 1340]

 

Codex Eugubinus, fol. 14. Compendium Instrumentorum

 

 

 

Instrumentum factum manu Benentesi Boncangni de Fulgineo, notarii, Anno Domini M CCC XL, die XXVIII Junii.

Quod frater Nicolellus Accomandutii de Eugubio de Ordine fratrum heremitarum Sti. Augustini, volens in dicto Ordine permanere, existens in ecclesia Sti. Augustini de Fulgineo, videlicet, ante altare genuflexus et manibus iunctis, in presentia religiosi et honesti viri fratris Iacobi domini Iohannis, prioris loci fratrum Sti. Augustini, dessiderans et affectans Deo et Bto. Augustino in dicto Ordine in ieiuniis, orationibus, castitate et honestate et aliis iuxta regulam dicti Ordinis servire (et) in dicto Ordine suam vitam ducere, in manu dicti fratris Iacopi, prioris, presentis, recipientis et stipulantis nomine et vice loci, Capituli et conventus fratrum heremitarum Sti. Augustini de Eugubio, se et bona sua omnia mobilia et immobilia, iura et actiones, que et quas habet in quibuscunque locis et contra quascunque personas, optulit Deo et loco predicto de Eugubio ac etiam dedit pro remissione peccatorum suorum et parentum suorum, promictens dicto fratri Iacopo, presenti, stipulanti et recipienti, vice et nomine Generalis dicti Ordinis, perseverantiam et perpetuam carentiam (sic) secundum regulam dicti Ordinis, et dicti Ordinis regulam observare, et iuravit ad sancta Dei evangelia, corporaliter tactis scripturis, contra dictam oblationem per eum factam aliquo tempore, tam occasione minoris etatis quam cuiuslibet alterius occasione, non facere vel venire, per se vel per alium, de jure vel de facto, sed ipsam semper ratam et firmam habere et tenere, ac tendere et observare. Item, aliud instrumentum factum manu supradicti Notarii et eo tempore, quod dictus frater Nicolellus, intra missarum solemnia, populo asistente, ut moris est fratrum dicti Ordinis, in manu fratris Iacopi, prioris Sti. Augustini et eius loci de Fulgineo, presentis et recipientis nomine et vice prioris generalis dicti Ordinis et suorum successorum, sponte et libera voluntate promisit obedientiam et castitatem et vivere sine proprio usque ad mortem, petens cum instantia et rogans humiliter sicut professus dicte religionis et sicut alii fratres professi ab omnibus factis (sic) obedientiis haberetur. Renumptians sponte omni beneficio Juris Canonici vel civilis, quo possit se defendere vel etiam venire, etc.