Frater Iohannes de Foce de Eugubio innocens de crimine traditionis declaratur

[21 luglio 1343]

 

Archiv. Commun. Eugub., Busta 59. Orig. perg. De sigillo in cera rubea, quod a tergo appositum erat, leve tantummodo vestigium remanet

 

 

 

Frater Dyonisius (de Mutina), Prior Generalis Ordinis fratrum heremitarum S.ti Augustini, licet indignus. Religioso viro fratri Iohanni de Foce de Eugubio, eiusdem Ordinis, salutem in Domino sempiternam. Cum proposueris coram nobis, iuncto generali Capitulo nuper Mediolani celebrato, quod, ad petitionem Commitum (sic) de Urbino te incusantium et dicentium quod voluisti tradere Civitatem Urbini eorum inimicis, in periculum et exterminium eorum et dicte Civitatis, per R.dum virum fratrem Guillelmum, predecessorem nostrum, sic male informatum, iniuste et contra iuris iustitiam et contra formam nostrarum Constitutionum, fueris detentus et carceratus, cum in nullo eorum, que contra te obiciebantur, offensisses, sed solum dicti comnites, ex hodio (sic) concepto et iniqua voluntate contra te, quia extrasseras quandam domum loci de Urbino de manibus eorum, agebant, et quia iniquum est ut quis sine culpa puniatur; idcirco, petebas humiliter ac reverenter, ut nobis placeret per nos vel alium, visitare locum de Urbino et fratres, qui ibi tunc temporis conventuales extiterunt, ac etiam alios, qui postmodum ad dictum locum accessere, necnon et fratres Nicolaum, lectorem, de Monticulo et Leonardum de Montefalconio, visitatores, qui de mandato religiosi viri fratris Thome de Fabriano, tunc provincialis in provincia Marchie, locum, fratres, necnon et seculares visitaverunt, et, si ita inveniretur, ut proponebas, quod te purgaremus ab infamia et redderemus immunem; sin autem, quod te offerebas ad portandam penam, prout demerita postulabant, condignam.

Et quia, sicut justitia dictat, ut sic rei puniantur ut mali non superbiant et in sua pertinacia obstinati indurentur, ita innocentes et iniuste oppressi liberentur et releventur, ut boni non contristentur, sed in sua innocentia et bona operatione roborentur. Hinc est, quod nos, tue petitioni, prout ex officio nobis iniuncto tenemur, condescendere cupientes, premissa diligenti examinatione Religiosorum virorum supradictorum, fratrum Nicolai de Monticulo et Leonardi de Montefalconio et eorum visitatione diligenter inspecta, ac premissa visitatione per nos et alios nostros omnium fratrum tunc temporis Urbini existentium, necnon et aliorum post hoc illuc accedentium, ac etiam recepto sacramento a XX et ultra fratribus sacerdotibus super sacros canones et si ea, que tibi obiciebantur, sciebant vel credebant esse vera in toto vel in parte, et quia in nullo te invenimus culpabilem in toto vel in parte, de hiis que tibi obiciebantur, sed omnes et singuli te excusabant.

Ideo, tenore presentium, declaramus te iniuste fuisse detentum, vinculatum ac carceratum, nec propter talem detentionem, vinculationem et carcerationem te incurrisse maledictiones, quas incurrunt iuste carcerati, et ita te habilem declaramus atque sententiamus ad omnia officia Ordinis, active et passive, ac si nunquam accidissent que acciderunt.

Data Eugubii, Anno Domini M CCC XLIII, die XXI julii.