Deliberatio fratrum Conventus Eugubini Ord. Erem. S. Augustini circa provisionem fratrum qui possessiones, quas habebant a Conventu, ipsi resignaverant

[7 ottobre 1358]

 

Codex Eugubinus, fol. 2v

 

 

 

Visa et subtiliter inspecta lictera Ven. Patris Generalis fratris Gregorii de Arimino sub anno Domini M CCC LVIII, die VII mensis ìnensis Octubris (1), in qua lictera continebatur quod ordinaretur certa provisio fratribus Eugubii, qui possessiones, quas habebant a conventu, sibi readsignaverant libere et expedite, ne proprietarii viderentur et notarentur, ordinatum fuit per priorem fratrem Bonum Iohannem dicti loci de Eugubio et alios fratres dicti conventus, qui inferius ponentur, quod de fructibus dictarum possessionum, omni anno, quando habebuntur, de quinque partibus, puta de quinque sextariis, dentur quatuor sextarii fratribus Pacifico et Symoni, et alia quinta pars remaneat conventui, et de X sextariis frumenti dentur VIII sextarii, et sic de omnibus aliis fructibus; et ita fiat fratri Iohanni de Fauce et sotiis suis, prout in alio quaterno conventus sunt scripti per manum provintialis fratris Nicholai de Civitate Ducali, ubi omnes et singuli particulariter nominantur, qui dictas possessiones adsignarunt tempore dicti provintialis. Et ut melius et perfectius lictera Generalis secundum suam intentionem executioni ponatur, detur talis provisio et adsignetur pro eorum necessitatibus de fructibus aliarum possessionum, quas habet conventus, cum in pecunia et in introitibus elymosinarum pecunie sit quasi totaliter alienus et vacuus, tum propter guerram diu habitam et tum propter gentem ineptam ad elargiendum elymosinas quoquo modo.

Fratres existentes ad dictam ordinationem factam in sacristia loci de Eugubio predicto fuerunt: fratres Matheus de Amelia, provintialis; sotius suus frater Iacobus de Montefalco; frater Bonus Iohannes, prior loci de Eugubio; frater Ugolinus, lector de Eugubio; frater Pacificus, lector; frater Symon Marfe, supprior; frater Petrus Perusini, frater Augtistinus Pacis, frater Paulus de Sigillo, frater Paulus Luce, frater Nicholaus Symonis, frater Martinus, frater Thomasutius, frater Paulutius.

 

 

(1) Neque sub die 7 octobris, neque sub alia die eiusdem mensis an. 1358, invenitur in Registro R.mi Greg. Ariminensis littera seu dispositio aliqua directa conventui Eugubino circa hanc rem. Sub die vero 27a mensis maii, eiusdem anni, pag. 24 praefati Registri, est scriptum in litteris Priori et conventui missis: "Placet nobis quod fratribus Iohanni de Fauce, Iohanni Gratioli, Leonardo Pacifico, Simoni Marfe, Guillelmo ac Georgio de Eugubio, qui, ut asseritis, possessiones, quas ex ordinatione ac permissione conventus tenebant, ipsi conventui libere reassignarunt, certam aliquam provisionem annnalem in vita ipsorum, congruam tamen et rationabilem, habito respectu etiam ad possessiones vel usufructus, quas vel quos conventui tribuerunt, toto tempore vite ipsorum inrevocabiliter eisdem tribuendam, ordinare et statuere, nostra freti auctoritate, non obstantibus ullis constitutionibus, additionibus seu usufructibus conventui resignatis, seu aliis quibuscumque. Alioquin, totum quicquid in predictis facere et ordinare vos contingeret sit irritum et inane."