Oblatio Matthaei Putii Brunelli

[28 novembre 1365]

 

Archiv. Commun. Eugub., Busta 58. Orig. membran.

 

 

 

In nomine Ihesuchristi. Amen. Anno eiusdem a nativitate Millesimo trecentesimo sexagesimo quinto, Indictione III, tempore d.ni Urbani Pape quinti, die veneris XXVIII mensis novembris. Matheus Putii Brunelli, de Comitatu Eugubii, Q. S. P. (quarterii S. Petri), de Villa nova plani, sponte et motu proprio, non seductus nec rogatus, volens anime sue saluti providere et imposterum residuum vite sue regulare intendens, ac sub B.ti Augustini regula vitam suam finire desiderans et Omnipotenti Deo et gloriose Virgini Marie, eius matri, et B.to Augustino servire pro oblato, et iunctis manibus genuflexus existens coram religioso viro fratri Jeronimo Jacomatii domini Mathey de Perusio, priore loci S.ti Augustini de prope Eugubium, Ordinis fratrum heremitarum S.ti Augustini, tenens manus suas intra manus dicti prioris, levatis oculis mentis in celum, obtulit se omnipotenti Deo et gloriose Virgini Marie, eius matri, et beato Augustino et omnibus Sanctis et dicto priori, recipienti et stipulanti nomine (proprio) et vice et nomine suorum successorum ac etiam dicti loci de Eugubio, promictens eidem priori, stipulanti ut supra, vivere secundum Regulam Beati Augustini usque ad mortem, secundum gratiam a Domino nostro Ihesuchristo sibi dandam. Qui prior, tenens ipsum Matheum per manus intra sua manus, nominibus quibus supra, recepit ipsum et acceptavit in oblatum dicti loci et Ordinis predicti, dicens dicto Matheo, tenens ipsum per manus intra eius manus: Ego, nomine et vice Prioris Generalis Ordinis fratrum heremitarum S.ti Augustini et supradicti loci dicti Ordinis, te in oblatum recipio atque acepto. Et quod tu deinceps sis particeps omnium orationum, ieiuniorum, abstinentiarum et vigiliarum, que fient in toto orbe per fratres dicti Ordinis, ad salutem anime tue et pro remissione tuorum peccatorum, in nomine Ihesuchristi. Necnon promictens nominibus quibus supra eidem Matheo, presenti et stipulanti, ipsum alimentare, prout alimentat fratres dicti loci conventuales, et ipsum alere et dare eidem vestimenta et calciamenta decentia. Et etiam promisit dare eidem licentiam tempore estivo, quod ipse possit filias suas et generos ipsius iuvare et consanguineos eius ad recoligendum extatem eorum et fructus terre tempore messionis et tribulationis et recolectionis bladii gratis.

Actum in loco S.ti Augustini de prope Eugubium, in sacristia dicti loci, presentibus Nicolello Silvestri Nigri et Vanne Ceccholi Maffey et Bartholello Vannis Nicole de Eugubio, quarterii S. Andree, testibus ad hec vocatis et habitis, mihi notis; et etiam ad hec omnia fuere presentes plures et multi fratres conventuales dicti loci et hoc volentes affectantes.

Ego Marinus Rubei de Eugubio, Imperiali auctoritate Judex ordinarius atque notarius, predictis omnibus interfui et de hiis rogatus, scripsi et publicavi.