Oblatio Marini Rubey, Notarii de Eugubio

[9 settembre 1367]

 

Cod. Eugub., fol. 2

 

 

 

Frater Iohannes de Foce de Eugubio, prior provincialis provintie Vallis Spoleti, Ordinis fratrum heremitarum S.ti Augustini, licet indignus. Discreto viro, sibique dilecto Ser Marino Rubey, notario de Eugubio, Salutem in eo qui est omnium vera salus. Propie (sic) devotionis affectu, quem ad nostrum Ordinem et ad fratres geritis, ut veridica nostrorum fratrum relatione didici atque propriis auribus a vobis viva voce loquente audivi, proponens coram me, presentibus priore et fratribus de conventu loci S.ti Augustini de Eugubio, Ordinis antedicti, quomodo non vi, dolo vel fraude, sed bona et mera ac deliberata voluntate, Deo servire cupiens in loco S. Augustini prenominato et una cum fratribus vitam ducere, manere et conversari ac etiam habitare, tanquam verus familiaris domus, ordinis et fratrum, eisque servire in arte notarie et aliis honestis servitiis prout tuus status requirit et tibi competit, tam de die quam de nocte, habitando in dormitorio cum fratribus et in mensa conventuali, tam in refectorio quam extra, comedendo et bibendo, sicut ceteri veri et intrinseci familiares dormire et habitare et comedere consueverunt, et cum diem extremum clauseris petis cum dictis confratribus et familiaribus intrinsecis in loco predicto sepeliri, adiudicans omnes de te descendentes, ex nunc, quandocunque decesserint sine testamento vel in legitimam etatem, in dicto (loco) sepelliendos, et hoc non obstante quod habitum exterius non deferas, quem tamen in corde semper portas; petens humiliter et devote, ut te recipiam modo et conditione prenominatis. Ego autem, considerans quod hoc quod petis cedat ad salutem anime tue, et Ordini atque conventui in speciali ad honorem et comodum, cum ad priorem provintialem spectet receptio novitiorum secundum Ordinis instituta, multo magis et familiariorum, qui perpetuo debent cum fratribus habitare. Ideo, tenore presentium, Spiritus Sancti gratia invocata, auctoritate qua fungor et de voluntate et consensu fratris Iacobi, prioris, ac etiam omnium aliorum fratrum de conventu, recipio te in familiarem domus, loci, conventus, ordinis et fratrum nostrorum de Eugubio, mandans priori, vel eius vicem gerenti, qui nunc est vel pro tempore fuerit, ut te tanquam unum ex confratribus nostris in omnibus debeat tractare, tam in dormitorio quam etiam in omnibus aliis officinis nostris, quousque Deo placuerit tibi vitam hic prestare.

Et demum sepulture beneficium exhibere, sicut uni ex confratribus Ordo consuevit et mandat.

Data Eugubii sub sigillo nostri provintialatus offitii, Anno Domini Millesimo Trecentesimo Sexagesimo septimo, die VIIII mensis Septembris.

Et Ego Marinus Rubey de Eugubio, publicus Imperiali auctoritate notarius, predictam literam in presenti de mandato dicti fratris Iohannis, prioris provintialis, transcripsi, scripsi et copiavi. Et predicta omnia, prout supra narrantur et scripta sunt confirmavi et aprobavi, et ad fidem et testimonium omnium predictorum presentem meam subscriptionem aposui.