Actum professionis fratris Thomae Putii

[13 febbraio 1369]

 

Archiv. Commun. Eugub., Busta 58. Orig. perg.

 

 

 

In nomine Ihesuchristi. Amen. Anno eiusdem a nativitate Millesimo Trecentesimo sexagesimo nono, Indictione VII, tempore d.ni Urbani Pape quinti, die XIII mensis februarii. Congregatis fratribus loci Sancti Augustini de prope Eugubium ad Capitulum in choro ecclesie dicti loci ad sonum campanelle de mandato Ven. viri fratris Symonis Paulutii Pauletti de Cassia, Prioris dicti loci. Ipse frater Symon, volens, presentibus dictis fratribus, recipere ad professionem fratrem Thomam Putii Rentii, Vassarii de Burgo S.ti Augustini, Q. S. A. (quarterii S. Andree) Civitatis Eugubii, novitium, qui pridie complevit terminum probationis novitii; facta primo examinatione de vita et conversatione et moribus ipsius novitii inter dictos fratres, in dicto loco ob hanc causam congregatos per ipsum priorem, dicentem eidem fratri Thomaso, presenti et coram ipso priore existente: "Sicut expertus fuisti, frater Thoma, novitius, tempore tue probationis omnem asperitatem Ordinis nostri, et in omnibus, preterquam in consiliis, fuisti nobiscum, sicut unus ex nobis; tempus advenit, ymmo est, ut eligas unum de duobus: an vis a nobis discedere et habire (sic) tuam viam, an vis renuntiare huic seculo et dedicare atque te ipsum offerre Deo totum et Ordini nostro. Sciens, quod postquam sic te otuleris (sic), dum sub iugo obedientie eiusdem Ordinis collum tuum submiseris, quacunque ex causa te non licebit excutere. Hoc audito et intellecto, respondit fratres Thomas eidem priori in presentia dictorum fratrum ibidem existentium, velle sic Deo et Ordini predicto se totum offerre. Tunc Prior benedixit cucullam ipsius fratris Thome et ipsum fratrem Thomam induit de dicta cuculla benedicta, presentibus et volentibus dictis fratribus, dicens: Induat te Deus novum hominem, qui secundum Deum creatus es, in iustitia, sanctitate et veritate.

Qui frater Thomas, sic indutus, genuflexus ad pedes Prioris predicti, et ad iussum eius, tenens Regulam B.ti Augustini in manu, posuit eam in manibus Prioris prefati (et) professionem suam fecit hiis verbis, dicens coram dictis Priore et fratribus sic: Ego Frater Thomas facio professionem et promitto obedientiam Deo Patri omnipotenti et Beate Marie Virgini ac Beato Augustino et tibi fratri Symoni, Priori dicti loci, recipienti nomine et vice Prioris Generalis fratrum heremitarum dicti Ordinis S.ti Augustini et subcessorum eius; vivere sine proprio, in castitate, secundum Regulam Beati Augustini, usque ad mortem. Rogantes me, notarium infrascriptum, ut de predictis conficerem publicum instrumentum.

Actum fuit hoc in choro ecclesie dicti loci S.ti Augustini, presentibus et volentibus et consentientibus dictis fratribus, in dicto choro sedentibus, et presentibus Marchesino Ser Nicole Ser Marci et Thaviano (sic) Silvestri Iacoputii, de Eugubio, Q. S. A. (quarterii S. Andree), testibus ad hec vocatis et rogatis.

Ego Marinus Rubei de Eugubio, Imperiali auctoritate Judex ordinarius atque notarius, predictis omnibus interfui et de hiis omnibus rogatus, scripsi et publicavi.