Oblatio et receptio in fratrem Ordinis Francisci Cecchi Pallie de Eugubio, quarterii S.ti Iuliani  (1)

[16 dicembre 1369]

 

Ex Cod. Eugub., fol. 61

 

 

 

In Nomine Ihesuchristi. Amen. Anno eiusdem Ihesuchristi a nativitate Millesimo Trecentesimo sexagesimo nono, Indictione septima, tempore d.ni Urbani Pape quinti die sextadecima, mensis decembris. Franciscus Cecchi Pallie de Eugubio, Quarterii S. Iuliani, sponte et motu proprio, non seductus neque rogatus, sed sua propria et spontanea voluntate, divinitus ductus, volens anime sue saluti providere et in posterum residuum sue vite reglare intendens ac sub Beati Augustini regula vitam suam finire desiderans et omnipotenti Deo et gloriose Virgini Marie, eius matri, et Beato Augustino servire pro oblato, et ipsius Beati Augustini regulam cum adiutorio Dei observare afectans, junctis manibus genuflexus existens coram religioso viro fratre Iohanne Udurighelli Angeli de Foce de Eugubio, priori loci S.ti Augustini de prope Eugubium, Ordinis fratrum heremitarum S.ti Augustini, tenens manus suas intra manus dicti prioris, levatis oculis mentis in celum, obtulit se omnipotenti Deo et gloriose Virgini Marie, eius matri, et b.to Augustino et omnibus Sanctis et dicto priori, recipienti et stipulanti nomine et vice prioris generalis Ordinis fratrum heremitarum S.ti Augustini et suo nomine et vice et nomine suorum successorum ac etiam dicti loci de Eugubio, cum omnibus suis bonis et cum omni jure et actione, quod et quam ipse habet et habiturus est in quibuscunque bonis et rebus quibuscunque et contra quascunque personas. Promictens eidem priori, presenti et stipulanti nominibus quibus supra, vivere deinceps secundum regulam Beati Augustini usque ad mortem, secundum gratiam a Domino nostro Ihesuchristo sibi datam et dandam. Qui prior, tenens ipsum Francischum per manus intra suas manus, nominibus quibus supra, recepit ipsum Francischum et acceptavit in oblatum dicti loci et ordinis predicti, tenens ipsum per manus intra suas manus, hec verba dixit: Ego Iohannes, prior dicti loci prefatus, nomine et vice prioris generalis Ordinis fratrum heremitarum S.ti Augustini et predicti loci dicti Ordinis, te, Franciscum, ibidem presentem et volentem ac consentientem, in oblatum recipio atque acepto, et quod tu deinceps sis particeps omnium bonorum spiritualium, videlicet, omnium orationum, ieiuniorum, abstinentiarum, vigiliarum atque obedientiarum, que fient in toto orbe terrarum per fratres dicti Ordinis, ad salutem tue anime et pro remissione tuorum peccatorum, in nomine Ihesuchristi, tibi concedo. Necnon promicto, nominibus quibus supra, tibi Francischo, presenti, iuvare te et tibi subvenire de substantia et bonis temporalibus dicti loci in tuis necessitatibus, secundum possibilitatem dicti loci et tuam decentiam. Et hec omnia acta fuerunt in presentia plurimorum et multorum fratrum dicti loci, volentium et consentientium.

Actum in loco S.ti Augustini predicto, in ecclesia dicti loci, presentibus Francischo Simonis Acortoli, quarterii S. Petri, et Theo Armanutii Ugolinelli et Paulo Vivaccii Venturelle, de quarterio S. Andree, testibus mihi notis, asserente Franc(ischo), teste predicto, se cognoscere dictum Francischum.

Ego Marinus Rubei de Eugubio, Imperiali auctoritate Iudex ordinarius atque notarius, predictis interfui et de hiis rogatus, scripsi et publicavi. (Signum notarii).

Sub dictis Anno, Indictione et pontificatu, die IIII temporum, XVIIII die mensis decembris, prior supra nominatus induit dictum Francischum veste et habitu fratrum heremitarum Ordinis predicti, ipso volente et petente et respondente dicto priori examinationibus sibi per dictum priorem et fratres secundum formam regule dicti Ordinis, in ecclesia dicti loci, ubi omnes fratres erant congregati ad sonum campanelle de mandato dicti prioris.

Qui prior et fratres singuli ipsum Francischum ad obsculum (sic) pacis receperunt, me notario predicto presente.

 

 

 

(1) Sic est scriptum, manu coaeva sed alio atramento in margine sinistra. Etiam in margine dextra, ab eadem manu, quae instrumentum scripsit, scriptum apparet: "Oblatio Francisci", et subtus, manu recentiori: "Beatus Franciscus, cuius ossa sunt in capella S.te Marie de Succursu". Memoria etiam extat B. Francisci in eod. Cod. fol. 62, 63 et 64.

Fol. 62 - An. 1370, nov. 12. - Praesens est Capitulo hac die celebrato in Conventu Eugubino ad deliberandum super venditione unius vineae "Fr. Francischus Cecchi Palglie de Eugubio".

Fol. 63 - An. 1371, iun. 25 - In capitulo hac die celebrato in eodem Conventu ad deliberandum circa provisionem et remunerationem fratris Paulutii Bartholutii, "qui noviter in capitulo generali facto Florentie creatus fuit lector", fuit etiam praesens "Fr. Francischus Cecchi, scolaris".

Fol. 64 - An. 1375, iul. 27. - Fr. Leonardus, procurator conventus, una cum fratre Dominico, ex parte conventus, iverunt cum fratre Francisco Cechi Pallie ad laboratorem terrarum sitarum in plano Eugubii et dederunt sibi licentiam, quod fructus dictarum terrarum, pro parte que sibi succedebat, daret Petro, filio supradicti Cecchi et germani sui, et hoc quia supradictus Petrus fecit sibi isto anno capam et alios pannos; ita quod voluit quod non habeat campum, et quod non possit dicere quod vestiat eum de suo et de parte sua, sed de parte fratris Francisci, et hoc fecit de consensu prioris Ven. fratris Iohannis de Foce".