Deliberatio Conventus super venditionem unius vineae

[12 novembre 1370]

 

Ex Cod. Eugub., fol. 62

 

 

 

In nomine Ihesuchristi. Amen. Anno eiusdem a nativitate Millesimo Trecentesimo Septuagesimo, Indictione VIII, tempore d.ni Urbani Pape quinti, die XII mensis novembris. Congregatis fratribus loci S.ti Augustini de prope Eugubium ad Capitulum ad sonum campanelle, ut moris est, in ecclesia dicti loci, de mandato Religiosi viri fratris Iohannis Butii de Clausera, prioris dicti loci, in qua congregatione et capitulo interfuerunt ipse prior et fratres conventuales dicti loci et fratres non conventuales de Eugubio infrascripti. Quorum nomina hec sunt, videlicet:

Fr. Iohannes de Clausera prior, de Eugubio;

Fr. Iohannes Udurighelli Angeli de Foce, lector, de Eugubio;

Fr. Petrus Perusini Ranerii, subprior, de Eugubio;

Fr. Ghuilielmutius Sabatelli Nertoli de Eugubio;

Fr. Nicolaus Symonis Karoncelli de Eugubio;

Fr. Leonardus Andrioli Angeli de Eugubio;

Fr. Paulus Luce Iuntarelli de Eugubio

Fr. Thomasutius Ser Petri Martini de Eugubio;

Fr. Philippus Ser Petri Martini de Eugubio;

Fr. Bernardus Lelli Nepolutii de Pergula;

Fr. Angelus Iohannis Luminate de Pergula;

Fr. Petrutius Lucoli Franchi de Eugubio;

Fr. Matheus Angeli Vannis de Eugubio;

Fr. Gabriel Mei Bartholelli de Eugubio;

Fr. Dominicus Ceccholi Bonamesere de Eugubio;

Fr. Lemosina Benetelli Pregadio de Eugubio;

Fr. Franciscus Cecchi Palglie de Eugubio;

Fr. Martinus Angelutii Lucoli de Eugubio;

Fr. Angelus Arcolani Putii de Eugubio;

Fr. Ventura Pauli Pucoli de Eugubio;

In qua congregatione capituli fratrum predictorum extitit propositum per dictum priorem inter dictos fratres de venditione vinee empte a Vanne d.ni Thadei per d.num Iacobum d.ni Ranutii de la Serra de Eugubio, pretium totum cuius vinee solutum fuit de propriis denariis capituli et conventus dicti loci, pro eo quia due partes dicte vinee sunt emphyteosim Monasterii S.ti Petri de Eugubio, et quia ex dicto d.no Iacobo nullus supervivens filius vel nepos ex linea masculina remansit, et de levi dictam vineam secundum jura dicti fratres et capitulum et conventus dicti loci admictere (sic) possent et erit devoluta dicto Monasterio. Et quia dictum Monasterium et Abbas et Monaci non sunt perfecti amici dictorum fratrum et benivolentes, et quia iam sunt transacti duo anni et ultra quod canon et pensio dicte vinee soluta non fuit, prout debuit, per d.nam Gostantiam, uxorem olim dicti d.ni Iacobi, que est heres universalis dicti d.ni Iacobi ex testamento condito per ipsum d.num Iacobum, et dominus Abbas et Monaci noluerunt recipere dictam pensionem. Et etiam propositum fuit in dicta congregatione fratrum de venditione vinee contigue dicte vinee empte a Casella Mathioli. Super quibus omnnibus supradictis prior prefatus petit a dictis fratribus utile consilium sibi dari, mandans et volens quod unusquisque frater dicat et exprimat voluntatem suam super predictis et vota eorum secure et libere dicant et exprimant super dictam materiam, in nomine Ihesuchristi.

Auditis votis omnium dictorum fratrum et quicquid dicere et consulere super predictis et quid volunt quod fiat super et de dicta venditione, omnibus consideratis et visis, que videnda sunt circha dictum negotium, pro meliori loci predicti et capituli et conventus ipsius loci, cum multa deliberatione exposito, ad evitandum periculum et multa pericula et inconvenientia, que possent ocurrere et supervenire si dicta venditio dictarum vinearum non fieret, unanimiter et concorditer et apensate deliberaverunt et declaraverunt et deliberando et declarando quilibet frater ex predictis fratribus contentus fuit et voluit et sibi placuit, quod dicte vinee vendantur omnino pro pretio condecenti et quod haberi poterit, dummodo totum pretium fiendum et habendum ex dictis vineis deponatur et de toto dicto pretio, absque diminitione, detur et expendatur in terris et possessionibus pro dicto conventu et in utilitate dicti conventus fructus possessionum emptarum, sive emendarum, de dicto pretio convertatur et in alia re vel pro alia utilitate converti vel dari seu expendi non possit. Et quod nullus prior vel quivis alius frater non sit ausus nec permictat quod pretium habendum ex dictis vineis in alium usum vel pro alia utilitate dicti conventus convertatur vel expendatur modo aliquo vel ingenio, nec baratetur, seu minima quantitas de dicto pretio extrahatur vel diminuatur, quin totum et integrum in terris et possessionibus detur et expendatur pro conventu dicti loci.

Post hec, de mense decembri dicti anni, frater Bartholomeus Magistri Bartholi de Eugubio, prior loci Calii, et frater Iacobus Petrutii, conventualis dicti loci, fratres heremite Ordinis S.ti Augustini, narratis cuilibet eorum dictam deliberationem et voluntatem (sic) fratrum suprascriptorum, placuit eis et cuilibet eorum dictam deliberationem (sic) et se conformaverunt cum voluntate dictorum fratrum et fuerunt contenti de omnibus et singulis, que supra scripta sunt, dummodo totum et integrum pretium dictarum vinearum expendatur in possessionibus et in alia re vel pro alia utilitate dicti loci et capituli et conventus non convertatur nec expendi possit vel debeat modo aliquo vel ingenio, ad hoc dictum pretium non baretur (sic), nec minima pars dicti pretii.