Oblatio Baldi Senaldoli Iohannis de Eugubio

[4 novembre 1373]

 

Ex Cod. Eugub., fol. 63v

 

 

 

In nomine Ihesuchristi. Amen. Anno eiusdem a nativitate Millesimo Trecentesimo septuagesimo tertio, die IIII mensis Novembris. Baldus Senaldoli Iohannis de Eugubio, quarterii S. Martini, sponte et motu proprio, non seductus neque rogatus, volens anime sue saluti providere ac imposterum residuum vite sue regulare intendens ac sub Beati Augustini regula vitam suam finire desiderans et omnipotenti Deo et gloriose Virgini Marie, eius matri, et Beato Augustino servire pro oblato afectans, iunctis manibus genuflexus existens coram religioso viro fratre Dominico Ceccholi de Eugubio, subpriore loci S.ti Augustini de prope Eugubio, Ordinis fratrum S.ti Augustini heremitarum, sedenti super scabellum altaris conventus, post missam conventus celebratam in ecclesia dicti loci, tenens manus suas intra manus dicti prioris (sic), levatis oculis mentis in celum, obtubit se et sua omnipotenti Dei et gloriose Virgini Marie, eius matri, et Beato Augustino et omnibus Sanctis et dicto Subpriori, recipienti et stipulanti suo nomine et vice ac nomine prioris generalis Ordinis fratrum heremitarum S.ti Augustini et suorum successorum ac etiam dicti loci de Eugubio, et etiam promisit obedientiam, vivere sine proprio et in castitate secundum regulam Beati Augustini usque ad mortem, prout gratiam a Domino Deo nostro sibi datam. Qui subprior, tenens dictum Baldum per manus intra suas manus, nominibus quibus supra, recepit ipsum et acceptavit in oblatum dicti loci et Ordinis predicti, dicens dicto Baldo, tenens ipsum per manus intra suas manus: Ego, nomine et vice prioris generalis Ordinis fratrum heremitarum S.ti Augustini et supradicti loci dicti Ordinis, te in oblatum recipio atque accepto, et quod tu deinceps sis particeps omnium missarum, orationum, jeiuniorum, vigiliarum, paupertatis, obedientie, laborum, abstinentiarum ceterorumque bonorum, que per fratres nostri Ordinis Dominus concesserit fieri per mundum universum et tibi partem et participationem concedo dictorum bonorum et omnibus consanguineis tuis, specialiter tuo patri et tue matri. Hec omnia acta fuerunt in ecclesia dicti loci S.ti Augustini, ante altare magnum, presentibus et volentibus et consentientibus fratre Paulutio Bartholutii Manni, lectore, fratre Petrutio Lucoli Franchi, fratre Augustino Angelutii (?) Cambioli et fratre Ventura Pauli Pucoli, sacrista, de Eugubio, et fratre Santi de Sigillo, fratribus dicti Ordinis omnibus supradictis, et etiam presentibus Lucolo Marci Ruffi, quarterii S. Martini, et Mascio Philipelli Angelutii, de dicto quarterio S. Martini Civitatis Eugubii, testibus ad hec vocatis et habitis.

Ego Marinus Rubei de Eugubio, Imperiali auctoritate Iudex ordinarius atque notarius, predictis interfui et de hiis rogatus scribere, scripsi et publicavi. Signum notarii.