Oblatio Lellae Marini de Eugubio

[26 marzo 1376]

 

Ex Cod. Eugub., fol. 64v

 

 

 

In nomine Ihesuchristi. Amen. Anno eiusdem a nativitate M CCC LXXVI, Indictione XIIII, tempore pontificatus d.ni Gregorii Pape XI, die XXVI mensis Martii. Lella Marini Cambii de Civitate Eugubii, de quarterio S. Andree, motu proprio et non seducta, volens anime sue saluti providere et imposterum residuum vite sue regulare intendens ac sub Beati Augustini regula vitam suam finire desiderans et omnipotenti Deo et gloriose Virgini Marie, eius matri, et Beato Augustino servire pro oblata affectans, iunctis manibus genuflexa existens coram religioso viro fratre Petrutio Lucoli Franchi de Eugubio, Vicario dicti loci S.ti Augustini de prope Eugubium, Ordinis fratrum heremitarum S.ti Augustini, vacante priore in dicto loco, tenens manus suas intra manus dicti Vicarii, levatis oculis mentis, obtulit se et sua omnipotenti Deo et gloriose Virgini Marie, eius matri, et Beato Augustino et omnibus Sanctis et dicto Vicario, recipienti et stipulanti nomine suo et vice et nomine suorum successorum et capituli et conventus dicti loci de Eugubio, et promisit obedientiam, vivere sine proprio et in castitate secundum regulam Beati Augustini usque ad mortem.

Qui Vicarius, tenens dictam Lellam per manus intra manus suas, nominibus quibus supra, recepit ipsam et acceptavit in oblatam dicti loci et Ordinis predicti, dicens dicte Lelle, tenens ipsam per manus intra suas manus: Ego nominibus quibus supra te oblatam recipio atque accepto, et quod tu deinceps sis particeps omnium missarum, orationum, jeiuniorum, vigiliarum, paupertatis, obedientiarum, laborum et abstinentiarum, ceterorumque bonorum, que per fratres dictis Ordinis Dominus concesserit fieri per mundum universum ad salutem anime tue et pro remissione tuorum peccatorum, in nomine Ihesuchristi. Amen. Actum in dicto loco S.ti Augustini, in ecclesia dicti loci, iuxta altare magnum conventus, presente fratre Bartholomeo Magistri Bartholi Magistri Christofani et presentibus testibus Petro Cicchi Thiri et Iohanne Baldi Iohannelli de Eugubio, quarterii S. Andree, testibus ad hec habitis, vocatis et rogatis.

Ego Marinus Rubei de Eugubio, Imperiali auctoritate Judex ordinarius atque notarius, predictis omnibus interfui et de hiis omnibus rogatus scribere, scripsi et publicavi. Signum notarii.