Oblatio d.nae Charae Datoli

[16 dicembre 1376]

 

Archiv. Com. Eugub., Busta 55. Orig. perg.

 

 

 

In Christi nomine. Amen. Anno Domini Millesimo CCC LXXVI, Indictione quartadecima, tempore d.ni Gregorii Pape undecimi, die XVI mensis decembris. Domina Chara, filia quondam Datoli et uxor olim Nicole de Villa Sancti Veriani, Comitatus Civitatis Eugubii, quarterii S.ti Martini, mente et corpore sana, satiata presentis seculi miseriis et erumpnis, considerans et matura deliberatione divolvens in mente, quod quanto plus huius vallis miserie, quas nefandis actibus se immiscet, tanto periculosius inextricabilibus laqueis animam suam carcerat et inodat; cupiens amore Domini nostri Ihesuchristi secularem vitam deserere et anime sue salubriter providere; cognoscens quod propter sanctam obedientiam, paupertatem et castitatem et regulares mores quis a penis infernalibus liberatur et celestibus letitiis fruitur in eternum; non vi, non dolo, non metu nec aliqua alia fraude vel persuasione inducta, sed sua plana, libera et spontanea voluntate, ex certa scientia, non per errorem, ut possit divine maiestati comodius et libere famulari et obedientie iugo submictere collum suum et regulari disciplina imposterum ducere residuum vite sue; optans beati Augustini religionem et regulam sacrosanctam assumere et in ipsa persistere donec eam dominam vitalis spiritus vegetaverit; coram honesto et religioso viro fratre Thosi de Eugubio, Ordinis fratrum heremitarum S.ti Augustini, Venerabili Subpriore loci et conventus S.ti Augustini de prope Eugubium, personaliter constituta, genibus flexis, manibus iunctis et in celum sue mentis oculis elevatis, infra manus dicti Subprioris, recipiens (sic) vice et nomine Omnipotentis Dei et sue gloriosissime genitricis Marie et beati Augustini, necnon Generalis Prioris Ordinis supradicti, manus suas immisit et obtulit et dedicavit se et omnia et singula sua bona, mobilia et immobilia et se moventia, jura et actiones, presentia et futura, ubicunque et in quecunque latera situata sint et reperiantur, promictens dicto Subpriori, stipulanti et recipienti ut supra, sanctam obedientiam, reverentiam et paupertatem et regularem oblationis vitam et omnia et singula ducere, facere et exercere, que ad dictam sanctam regulam oblationis vitam et omnia et singula ducere, facere et exercere, que ad dictam sanctam regulam, oblationem, obedientiam et dedicationem pertinent et spectant de consuetudine vel de jure et secundum canonicas sanctiones, dicens expressis verbis: "Ego Chara, filia quondam Datoli et uxor olim Nicole de loco supradicto, cordialiter promicto et spondeo Omnipotenti Deo et sue beatissime genitrici Marie et beato Augustino et Tibi Subpriori predicto, stipulanti et recipienti vice et nomine supradictis, perpetuo observatura regulam oblatorum S.ti Augustini et obedientiam et paupertatem et continentiam et conversionem meorum morum et reverentiam et continuam stabilitatem, secundum morem et consuetudinem in dicto Ordine actenus (sic) observatos".

Et versa vice, prefatus Subprior, vice et nomine quibus supra, pro se et suis in dicto subprioratus officio subcessoribus, predictam Charam in oblatam sponte recepit et acceptavit ad regulam predictorum Ordinis et conventus, tenens eandem Charam per manus, dixit eidem: "Ego, nomine et vice superius declaratis, te in oblatam recipio devotius et acepto (sic). Et quod deinceps tu sis particeps omnium et singularium missarum, orationum, ieiuniorum, vigiliarum, paupertatis, obedientiarum, laborum, omniumque bonorum operum, que per fratres dicti Ordinis omni tempore fieri conceditur per universum orbem, pro remissione tuorum peccatorum et anime tue salute, ad laudem et reverentiam Omnipotentis Dei et omnium Sanctorum". Rogantes me notarium infrascriptum, ut de predictis omnibus suprascriptis conficerem publicum Instrumentum.

Actum in Castro Fratte filiorum Uberti (1) diocesis Eugubine, in ecclesia S.te Marie dicti Ordinis, ante et iuxta altare Conventus et coram Crucifisso, presentibus Iohanne Andrutii, Symone Trigii, Vanne Guindonis, Vanne Alenutii, omnibus de dicto Castro, et quampluribus aliis testibus ad hec habitis, vocatis et rogatis.

Et Ego Antonius quondam Vagnarelli de Montesalviano, Comitatus Civitatis Castelli, habitator in suprascripto Castro Fratte filiorum Umberti, Imperiali auctoritate Judex ordinarius atque Notarius, predictis omnibus interfui et rogatus ea scribere, scripsi et publicavi et finaliter signum consuetum apposui.

 

 

 

(1) Locus iste anno 1862 nomen mutavit et hodie dicitur "Umbertide". T. Herrera in Alphabetum, Conventum Frattensem non nominat; A. Lubin ipsum citat in Orbis Augustinianus, p. 212, sub titulo S. Augustini; at cum A. Lubin anno 1672 suum opus dedit in lucem iam non existebat. Ex Cod. Cc. 25, fol. 166v, in Arch. Ord. constat ipsum suppressum fuisse an. 1652, virtute decreti Innocentii Pp. X. Eius existentiam anno 1650 demonstrat quaedam Relatione anno praedicto, die 20 martii, facta et subscripta a PP. Paulo Santinelli dalla Fratta, Vicario, et Prospero Lero ac Gentile Cruciati Perugino, Deputatis, asservata in copia in Archivio Ordinis, Cod. Ii, 5, fol. 201-202v. In ea sequentia leguntur, scitu digna: "Il Convento di S. Agostino situato nella Terra della Fratta di Perugia, Diocesi di Gubio, stà nelli Borghi di sopra interiori, in strada pubblica, amurato e di passaggio. Ha la Chiesa sotto il titolo di detto Santo, assai antica, che per causa di guerre non vi è memoria. Leggensi bene nella facciata, sopra la porta di detta Chiesa, in una pietra, le seguenti parole: "Fr. Antonius, Procurator et Prior, 1532". Nelle campane vi è anco antichità; una fatta nel 1385 e l'altra nel 1422. Gl'Antichi hanno detto che una certa Donna donò al Convento di Gubio il sito con un Podere, con patto che passando li fratri di S. Agostino fossero aloggiati, e che il sudetto Convento di Gubio tenne molto tempo un Padre a questo effetto, e poi le donò alla Provincia e fu fatto Priorato".