Oblatio Finae Salbatelli Turpini de Eugubio

[21 marzo 1377]

 

Ex Cod. Eugub., fol. 65

 

 

 

In nomine Ihesuchristi, Amen. Anno a nativitate eiusdem Millesimo Trecentesimo septuagesimo septimo, Indictione XV, tempore d.ni Gregorii Pape XI, die XXI mensis Martii. Fina Salbatelli Turpini, de quarterio S.ti Petri Civitatis Eugubii, motu proprio et non seducta, volens anime sue saluti providere et imposterum residuum vite sue regulare intendens, ac sub Beati Agustini regula vitam suam finire desiderans et omnipotenti Deo et gloriose Virgini Marie, eius matri, et Beato Augustino servire pro oblata affectans, junctis manibus existens genuflexa coram Religioso viro fratre Iohanne Thofi Alevoli de Eugubio, subpriori fratrum loci S.ti Augustini de prope Eugubium, Ordinis fratrum heremitarum S.ti Augustini, tenens manus suas intra manus dicti subprioris, levatis oculis mentis, obtulit se et sua omnipotenti Deo et gloriose Virgini Marie, eius matri, et beato Agustino et omnibus Sanctis et dicto subpriori, recipienti et stipulanti nomine suo et vice et nomine suorum subcessorum et capituli et conventus dicti loci de Eugubio et promisit obedientiam, vivere sine proprio et in castitate secundum regulam Beati Agustini usque ad mortem.

Qui frater Iohannes, subprior, tenens dictam Finam per manus intra suas manus, nominibus quibus supra, recepit ipsam et acceptavit in oblatam dicti loci et Ordinis predicti, dicens dicte Fine, tenens ipsam per manus intra suas manus: Ego, nominibus quibus supra, te oblatam recipio atque acepto, et quod tu deinceps sis particeps omnium missarum, orationum, jeiuniorum, vigiliarum, paupertatis, obedientiarum, laborum et abstinentiarum, ceterorumque bonorum, que per fratres dicti Ordinis Dominus fieri concesserit per universum mundum, ad salutem anime tue et pro remissione tuorum peccatorum, in nomine Ihesuchristi. Amen.

Actum in capitulo fratrum dicti loci, videlicet, iusta altare, presentibus fratre Paulutio Bartholutii Manni, fratre Petrutio Lucoli Franchi, fratre Dominico Ceccholi Bonamesure, fratre Benedicto Bevenuti Ser Mathey, fratribus dicti loci, et Ser Lello Bentevennis Ugolini, Rentio Petrutii Massoli, vocato Pignatta, et Matheo Salbatutii Ulivelli de Eugubio, testibus ad hec vocatis et habitis, mihi notis, partes contrahentes mihi notas.

Et Ego Mathiutius Ser Marini de Eugubio, Imperiali auctoritate Iudex ordinarius atque notarius, predictis omnibus et singulis presens interfui, rogatus scripsi et publicavi. Signum notarii.