Oblatio dominae Nerae Blaxii

[31 agosto 1378]

 

Ex Cod. Eugub., fol. 66v

 

 

 

In nomine Domini, Amen. Anno Domini Millesimo CCC LXXVIII, Indictione secunda, tempore d.ni Urbani Pape sexti, die ultima mensis Augusti. Acta supter logia claustri S.ti Augustini, iussta fontem dicti claustri, presentibus fratri Nichola Simonis, fratri Marcho Cole, Matheo Putii, Mathiolo Ghelfoli de Eugubio et Francisscho Iohannis de Petralunga, testibus ad hec habitis et vocatis, asserentibus se cognoscere contrahentes. D.na Nera, uxor olim Blaxii Sabbatelli de Eugubio, quarterii S.ti Petri, non seducta, sed suo proprio motu, volens providere saluti anime sue et intendens imposterum regulare residuum vite sue et desiderans vitam suam finire sub regula Beati Augustini et omnipotenti Deo et gloriose Virgini Marie, Matri eius, et Beato Augustino servire pro oblata, esisstens genuflessa coram religioso viro fratri Bartholomeo Magistri Bartholi Magistri Christofori de Eugubio, prior(e) fratrum loci heremitarum S.ti Augustini de prope Eugubium, iuntis manibus, tenens manus suas intra manus dicti prioris, levatis oculis mentis, obtulit se omnipotenti Deo et gloriose Virgini Marie, Matri eius, et beato Augustino et omnibus Sanctis et dicto priori, presenti et stipulanti vice et nomine prioris generalis dicti Ordinis et ipsius prioris dicti loci et suorum subcessorum et capituli et conventus dicti loci de Eugubio. Et promisit et convenit dicto priori, presenti, ut supra stipulanti et recipienti, obedientiam, reverentiam et castitatem et vivere sine proprio secundum regulam Beati Augustini usque ad mortem.

Qui frater Bartholomeus, prior, tenens dictam dominam Neram per manus intra suas manus, nominibus quibus supra, recepit dictam d.nam Neram et acceptavit in oblatam dicti loci et Ordinis predicti, dicens dicte d.ne Nere, tenens ipsius manus intra suas manus: Ego, nominibus quibus supra, recipio te atque acepto pro oblata et quod tu deinceps sis particips omnium missarum, ieiuniorum, vigiliarum, orationum, paupertatis, obedientiarum, laborum et abstinentiarum, ceterorumque bonorum, que per fratres dicti Ordinis Dominus noster Ihesus Christus fieri concesserit per universum mundum, ad salutem anime sue (sic) et pro remissione peccatorum suorum, in nomine Domini Ihesu Christi.

Et Ego Ventura Nigri de Eugubio, Imperiali auctoritate Iudex ordinarius atque notarius, omnibus et singulis suprascriptis interfui, rogatus scripsi, publicavi et meum singnum apposui. Signum Notarii.