Oblatio Bartholi Angeli Johannoli

[22 luglio 1379]

 

Ex Cod. Eugub., fol. 65

 

 

 

In nomine Ihesuchristi, Amen. Anno a nativitate eiusdem Millesimo Trecentesimo septuagesimo nono, Indictione secunda, tempore d.ni Urbani Pape VI, die XXII mensis Julii. Bartholus Angeli Iohannoli, olim de villa S.ti Laurentii de Ripis, Comitatus Eugubii, motu proprio, non seductus, volens saluti anime sue providere et imposterum residiuum vite sue regulare intendens ac sub regula beati Agustini vitam suam finire desiderans et omnipotenti Deo et gloriose Virgini Marie, matri eius, et Beato Agustino servire pro oblato desiderans, existens genuflexus coram Religioso viro fratre Bartholomeo Magistri Bartholi Magistri Christofori, priore fratrum dicti loci S.ti Agustini de prope Eugubium, Ordinis fratrum heremitarum, juntis manibus, tenens manus suas intra manus dicti prioris, levatis oculis mentis, obtulit se et sua omnipotenti Deo et gloriose Virgini Marie, eius matri, et Beato Agustino et omnibus Sanctis et dicto priori, presenti, stipulanti et recipienti nomine suo et vice et nomine suorum subcessorum et capituli et conventus dicti loci S.ti Agustini de Eugubio. Et promisit dicto priori, ut supra stipulanti et recipienti, obedientiam et vivere secundum regulam Beati Agustini usque ad mortem.

Qui frater Bartholomeus, prior, tenens dictum Bartholum per manus intra manus suas, nominibus quibus supra, recepit ipsum Bartholum et aceptavit in oblatum dicti loci et Ordinis predicti, dicens dicto Bartholo, tenens ipsum per manus intra suas manus: Ego, nominibus quibus supra, te pro oblato recipio atque acepto, et quod tu deinceps sis participes (sic) omnium missarum, orationum, jeiuniorum, vigiliarum, paupertatis, obedientiarum, laborum et abstinentiarum, ceterorumque bonorum, que per fratres dicti Ordinis Dominus noster Ihesuschristus fieri concesserit per universum mundum, ad salutem anime tue et pro remissione tuorum peccatorum, in nomine Domini nostri Ihesuchristi.

Actum in loco fratrum S.ti Augustini de prope Eugubium, videlicet, in capitulo dicti loci, presentibus Bartholello Vannis Nicole, vocato Gheça, et Beato Blaxii Bonaghide, de quarterio S. Andree Civitatis Eugubii, testibus ad hec vocatis et habitis, mihi notis et qui cognoscunt partes contrahentes mihi notas.

Ego Mathiutius Ser Marini de Eugubio, Imperiali auctoritate Iudex ordinarius atque notarius, predictis omnibus et singulis presens interfui, rogatus scripsi et publicavi. Signum notarii.