Oblatio Philippi Paschutii

[14 agosto 1379]

 

Ex Cod. Eugub., fol. 66

 

 

 

In nomine Ihesuchristi, Amen. Anno a nativitate eiusdem Millesimo Trecentesimo septuagesimo nono, Indictione secunda, tempore d.ni Urbani Pape VI, die XIIII mensis Augusti. Filippus Paschutii de Villa Plani S.ti Donati, non seductus, sed suo proprio motu, volens providere saluti anime sue et intendens imposterum residuum vite sue regulare et desiderans vitam suam finire sub regula Beati Agustini et omnipotenti Deo et gloriose Virgini Marie, matri eius, et beato Agustino servire pro oblato, existens genuflexus coram religioso viro fratre Bartholomeo Magistri Bartholi Magistri Christofori de Eugubio, priori fratrum loci heremitarum S.ti Agustini de prope Eugubium, juntis manibus, tenens manus suas intra manus dicti prioris, levatis oculis mentis, obtulit se omnipotenti Deo et gloriose Virgini Marie, matri eius, et beato Agustino et omnibus Sanctis et dicto priori, presenti et stipulanti vice et nomine prioris generalis dicti Ordinis et ipsius prioris dicti loci et suorum subcessorum et capituli et conventus dicti loci de Eugubio.

Et promisit et convenit dicto priori, presenti et ut supra stipulanti et recipienti, obedientiam, reverentiam et castitatem et vivere sine proprio secundum regulam beati Augustini usque ad mortem. Qui frater Bartholomeus, prior, tenens dictum Philippum per manus intra manus suas, nominibus quibus supra, recepit dictum Phylippum et aceptavit in oblatum dicti loci et Ordinis predicti, dicens dicto Phylippo, tenens ipsius manus intra manus suas: Ego, nominibus quibus supra, recipio te atque acepto pro oblato et quod tu deinceps sit participes (sic) omnium missarum, jeiuniorum, vigiliarum, orationum, paupertatis, obedientiarum, laborum et abstinentiarum, ceterorumque bonorum, que per fratres dicti Ordinis Dominus noster Ihesuschristus fieri concesserit per universum mundum, ad salutem anime tue et pro remissione peccatorum tuorum, in nomine d.ni nostri Ihesuchristi.

Actum in loco fratrum S. Augustini de prope Eugubium, videlicet in capitulo dicti loci, presentibus Angnolello Ugolinelli Masscii Vocti, Galinelle et Petro Cecchi Tiri de Eugubio, testibus ad hec vocatis et habitis, mihi notis et qui cognoscunt partes contrahentes, mihi notas.

Ego Mathiutius Ser Marini de Eugubio, Imperiali auctoritate Iudex ordinarius atque notarius, predictis omnibus et singulis presens interfui, rogatus scripsi et publicavi. Signum notarii.