Oblatio Matthaei Teverutii Sensoli et Sensoli Benoli Benencase

[2 febbraio 1380]

 

Ex Cod. Eugub., fol. 67

 

 

 

In nomine Ihesuchristi, Amen. Anno a nativitate eiusdem Millesimo Trecentesimo octuagesimo, Indictione III, tempore d.ni Urbani Pape VI, die secunda mensis Februarii. Matheus Teverutii Sensoli, olim de villa Glagiani et nunc de quarterio S. Petri Civitatis Eugubii, non seductus, sed sua propria et spontanea voluntate, volens saluti anime sue providere et intendens imposterum regulare residuum vite sue et affectans vitam suam finire sub regula Beati Agustini et omnipotenti Deo et gloriose Virgini Marie, matri eius, et beato Agustino servire pro oblato, existens genuflexus coram religioso viro fratre Bartholomeo Magistri Bartholi Magistri Christofori de Eugubio, priori dicti loci fratrum heremitarum S.ti Augustini de prope Eugubium, iuntis manibus, tenens manus suas intra manus dicti prioris, oculis mentis levatis, obtulit se omnipotenti Deo et gloriose Virgini Marie, matri eius et beato Agustino et omnibus Sanctis et dicto priori, presenti et stipulanti nomine et vice prioris generalis dicti Ordinis et ipsius prioris dicti loci et suorum subcessorum et capituli et conventus dicti loci de Eugubio. Et promisit et convenit dicto priori, presenti et stipulanti nominibus quibus supra, obedientiam, reverentiam et castitatem et vivere sine proprio secundum regulam beati Agustini toto tempore vite sue.

Qui frater Bartholomeus, prior predictus, tenens dictum Matheum per manus intra suas manus, recepit eum nominibus quibus supra et aceptavit ipsum Matheum in oblatum dicti loci et Ordinis predicti, dicens dicto Matheo, tenens manus suas intra suas manus: Ego, nominibus quibus supra, recipio te atque acepto pro oblato et quod tu deinceps sis particeps omnium missarum, ieiuniorum, vigiliarum, orationum, paupertatis, obedientiarum, laborum et abstinentiarum, ceterorumque bonorum, que per fratres dicti Ordinis fieri concesserit Dominus noster Ihesus Christus per universum mundum, ad salutem anime tue et pro remissione pecchatorum tuorum, in nomine d.ni nostri Ihesuchristi. Rogantes me notarium ut de predictis publicum conficerem instrumentum.

Actum in dicto loco fratrum S. Augustini de prope Eugubium, videlicet, in capitulo dicti loci, presentibus Pero Vangnorelli Agure et Nicolao Manni Petrucoli de quarterio S. Andree Civitatis Eugubii, testibus ad hec vocatis et habitis, mihi notis, partes contrahentes mihi notas. Eodem die, mense, anno etc. oblatio Sensoli Benoli Benencase, de villa Glogiani, Comitatus Eugubii, eiusdem tenoris per omnia.

Ego Mathiutius Ser Marini de Eugubio, Imperiali auctoritate Iudex ordinarius atque notarius, predictis omnibus et singulis in suprascriptis duobus instrumentis contentis presens interfui, rogatus scripsi et publicavi. Signum notarii.