Marinus Gnoli Venturelle de Eugubio, titulo donationis inter vivos, tradidit fratri Tomassutio Petri de Eugubio fructus et usufructus unius petii terrae

[6 agosto 1397]

 

Cod. Eugub., fol. 75. Originale

 

 

 

In nomine Christi, Amen. Anno Domini Millesimo CCC LXXXXVII, indict. quinta, tempore D.ni Bonifatii Papa noni, die sexta mensis Augusti. Marinus Gnoli Venturelle de Eugubio, quarterii S.ti Petri, titulo donationis, irrevocabiliter inter vivos, pure, libere et sua spontanea voluntate, per se et suos heredes, dedit, tradidit et donavit fratri Tomassutio Ser Petri de Eugubio, de Ordine fratrum heremitarum S.ti Augustini de Eugubio, presenti et stipulanti, omnes et singulos fructus et usufructus percipiendos ex quodam petio terre laborative, dudum empto per dictum Marinum a Tomassutio Villani Tomassutii de Eugubio, quod petium terre positum est in Villa nova plani, comitatus Eugubii. Fines a duobus, vie publice; ab alio, Francisscus Masscii; ab alio, Saulus Pucoli et Francischus Massci et Matheus Paganelli; ita quod dictus Fr. Tomassutius deinceps possit et valeat dictam rem pro dicto usufructu et reditibus et proventibus dicte rei, ipsam rem tenere et possidere et ea uti et frui pro omni sua necessitate et comoditate, prout ipse dixerit et declaraverit sibi necesse esse; hac tamen conditione et pacto (?) quod in continenti post mortem dicti fratris Tomassutii, dicti fructus et usufructus rei predicte sint et esse debeant dicti loci et fratrum heremitarum, in utilitatem et comodum eorum convertendos, cum hac condictione et hoc pacto (?) quod per Capitulum vel fratres dicti loci non possit vel debeat fieri aliqua venditio vel alienatio in aliquem vel aliquos, aliquo modo vel causa aut titulo; et si in aliquo fuerit contrafactum, dictus Marinus, ex nunc prout ex tunc, dictam donationem revocavit et ipsos fructus et usufructus devenire voluit ad Capitulum canonice S.ti Mariani maioris ecclesie Eugubine, hac condictione et pacto (?), quod per ipsum Capitulum vel Canonicos dicte canonice non possit fieri aliqua vendictio vel alienatio dictorum fructuum et usufructuum predictorum, generaliter vel particulariter, et si in aliquo fuerit contrafactum, ex nunc prout ex tunc dictum Capitulum et Canonicos dicte canonice dictis fructibus et usufructibus predictis privavit et ipsos fructus, ex nunc prout ex tunc, dedit et donavit Monasterio S.ti Petri de Eugubio et eius Capitulo, cum hac condictione, quod de predictis nulla fieri possit alienatio; et si contrafactum fuerit, ex nunc dictam donationem et concessionem revocavit et ipsos fructus et usufructus dedit et donavit et concessit Hospitali Iunte sive S.te Marie de Caritate de prope Eugubium, cum hac condictione et pacto (?) appositis omnibus supradictis, quod si et in quantum contingeret quod supradicti Monaci aut Canonici vel dictum Hospitale, sive prior vel capitulum ipsius Hospitalis, vel syndici predictorum locorum et Monasterium, communiter et concorditer dictos fructus et usufructus alienarent, etiam cum consensu heredum dicti Marini, aut aliquid facerent quominus predicti fructus et usufructus annuatim ad loca et monasteria et capitula antedicta in supradictis casibus non redierint, in casibus predictis dictos fructus et ususfructus dedit et donavit et esse voluit Camere Romane Ecclesiae pleno iure, predictas donationes et concessiones in dicto casu penitus revocando.

Que omnia et singula supradicta fecit dictus Marinus pro salute anime sue et pro remissione peccatorum suorum. Quam rem superius consignatam occasione predicta, nomine omnium predictorum in casibus predictis, constituit se possidere donec ipsius rei possessionem acceperit, vel acceperint, corporalem, quam accipiendi eius vel eorum auctoritate in casibus predictis eidem vel eisdem licentiam omnimodam dedit, promictens de re predicta vel eius occasione, de et predictis fructibus vel eorum occasione, predicto fratri Tomassutio et michi Notario infrascripto, stipulanti vice et nomine omnium predictorum, litem vel controversiam eisdem vel alicui eorum ullo tempore non inferre etc. etc.

Quas donationes et concessiones et omnnia et singula supradicta promisit dictus Marinus dicto fratri Tomassutio et mihi Notario infrascripto, stipulanti ut supra, perpetuo firma et rata habere et tenere et in nullo contrafacere vel venire aliqua causa vel ingenio etc. etc. Actum in Civitate Eugubii et quarterio S.ti Petri, in domo supradicti Marini, presentibus Iacobo Pinoli Venturelle et Angelo Angelutii Venturelle et Paulo Marini Gnoli de Eugubio, quart. S.ti Petri, testibus ad predicta vocatis et rogatis, se asserens cognoscere partes et mihi Notario notas.

Et Ego Veraginus Iohannis de Eugubio, Imperiali auctoritate Notarius et Iudex ordinarius, predictis omnibus et singulis interfui, rogatus scripsi et publicavi et meum signum apposui consuetum. Signum Notarii.