Oblatio Mag. Bartoli Mazzi de Eugubio

[13 gennaio 1398]

 

Archiv. Commun. Eugub., Busta 58. Orig. Perg.

 

 

 

In nomine Domini. Amen. Anno eiusdem Millesimo CCC LXXXXVIII, Indictione VI, tempore d.ni Bonifatii Pape VIIII, die XIII mensis Ianuarii. Actum in monasterio seu loco Sancti Augustini, extra et iuxta portam S.ti Augustini de Eugubio, in ecclesia dicti loci, ante maius altare dicti loci seu ecclesiae, presentibus Paulello Mercati Valentini et Iohanne Baldelli Angelutii de Eugubio, testibus ad infrascripta habitis, vocatis et rogatis, asserentibus se cognoscere infrascriptis contrahentibus (sic) et michi, notario infrascripto (sic) a voce cognoscere. Existens genuflessus Mag(ister) Bartholus Mazzi de Eugubio, quarterii S.ti Martini, ante maius altare dicti loci S.ti Augustini, coram Ven. viro fratre Augustino Angelutii de Eugubio, priore dicti loci Sancti Augustini, se et omnia sua bona obtulit Deo et beato Augustino et loco predicto, clausis manibus in manu et manibus dicti prioris, presentis et acceptantis pro dicto Monasterio.

Qui prior ipsum M. Bartolum, presentem et petentem, in oblatum et conversum dicti loci, ad participationem omnium bonorum dicti loci, recepit et acceptavit et admisit. Que omnia et singula promiserunt dicte partes vicissim perpetuo adtendere et non contrafacere sub obligatione bonorum dicti Monasterii, seu loci, et dicti M. Bartoli. Insuper (sic), dictus M. Bartolus iuravit ad sancta Dei evangelia, manu corporaliter tactis scripturis, predicta omnia adtendere et non contra facere sub iam dicta pena.

Rogantes me notarium infrascriptum, ut de predictis publicum conficerem instrumentum.

Et Ego Petrus Ser Gaudi, Imperiali auctoritate notarius et Iudex ordinarius, predictis omnibus interfui; rogatus, scripsi et publicavi.