Angelus Vilani Donati donationem facit fratri Thomassutio Ser Petri de Eugubio, Ord. S. Aug. de omnibus fructibus et usufructibus cuiusdam terreni positi in Villa nova Plani, communit. Eugubii

[4 febbraio 1400]

 

Cod. Eugub., fol. 76-77. Originale

 

 

 

In nomine Christi, Amen. Anno Domini Millesimo CCCC, indict. VIII, tempore D.ni Bonifatii Pape noni, die quarta mensis februarii. Angelus Vilani Donati de Eugubio, quarterii S.ti Petri, per se et suos heredes; si proprium, iure proprio; si condititium aut libellarium, salvo iure cuius est proprietas pro pensione et renovatione debenda ex re integra, et salvo et expresse reservato iure Communis Eugubii pro datiis, impositis et aliis oneribus dicti Communis, secundum formam ordinationum et reformationum dicti Communis; dedit et donavit Fratri Thomassutio Ser Petri de Eugubio, presenti et stipulanti, omnes et singulos fructus et usufructus percipiendos et recolligendos ex quodam tenimento terre, positum in Communitate Eugubii, in Villa nova plani; fines, ab uno, via; ab alio, flumen Sappacineris; et ab aliis, Nicolaus Pacis de Ricchis. Quam rem dictus Angelus emerat a Petro Magri. Antonii de Eugubio, prout patere asseruit publico instrumento scripto manu Ser Franciscii Ser Mathey, Notarii de Eugubio; ita quod dictus Fr. Thomassutius deinceps possit et valeat dictam rem pro dicto usufructu tenere et possidere et ipsa re uti et frui pro omni sua necessitate et comoditate, prout ipse dixerit et declaraverit sibi fore et esse necesse, hac condictione et pacto, quod incontinenti post mortem dicti Fratris Thomassutii, fructus et usufructus rei predicte sint et esse debeant dicti loci et fratrum S.ti Augustini, in eorum comodum et utilitatem convertendos, cum hac condictione et hoc pacto, quod per Capitulum vel Fratres dicti loci non possit vel debeat fieri aliqua vendictio vel alienatio in aliquem vel aliquos, aliquo modo, titulo vel causa, propter quod impediatur predictos fructus et ususfructus annuatim devenire ad Capitulum dicti loci, et, si in aliquo fuerit contrafactum, dictus Angelus, ex nunc prout ex tunc, dictam donationem revocavit et ipsos fructus et usufructus devenire voluit ad Capitulum Canonice S.ti Mariani maioris ecclesie Eugubine, hac condictione et pacto, quod per ipsum Capitulum et Canonicos predictos dicte Canonice non possit fieri aliqua vendictio vel alienatio dictorum fructuum et ususfructuum, generaliter vel particulariter, quin deveniant ad dictum Capitulum Canonice predicte quolibet anno, aut devenire impediatur; et, si in aliquo fuerit contrafactum, ex nunc prout ex tunc, dictum Capitulum et Canonicos dictis fructibus et ususfructibus privavit, et ipsos fructus et usufructus, ex nunc prout ex tunc, dedit et donavit Monasterio S.ti Petri de Eugubio et eius Capitulo, cum hac condictione, quod nulla de predictis fructibus et ususfructu fieri possit alienatio; quod si contrafactum fuerit, ex nunc dictam donationem et concessionem revocavit, et ipsos fructus et ususfructus dedit, donavit et concessit Hospitali S.te Marie de Caritate de prope Eugubium, quod vocatum Hospitale Iunte, cum hac condictione et pacto appositis omnibus predictis; quod si et in quantum contingeret supradictos fratres vel Capitulum dicti loci fratrum, aut predictos Canonicos, aut Monachos, vel dictum Hospitale, sive priorem vel capitulum dicti Hospitalis, vel syndicos predictorum locorum et monasteriorum, communiter vel concorditer, dictos fructus et ususfructus alienare, etiam cum consensu subcessorum vel heredum dicti Angeli, aut aliquid facere quominus dicti fructus et ususfructus annuatim ad loca et monasteria et capitula antedicta, in casibus supradictis, non redirentur, dictos fructus et ususfructus, ex nunc prout ex tunc, dedit et donavit et esse voluit Camere Romane Ecclesie pleno iure, predictas donationes et concessiones penitus revocando. Que omnia et singula supradicta fecit dictus Angelus pro salute anime sue et pro remissione peccatorum suorum. Quam rem superius confinatam occasione predicta, nomine omnium predictorum in casibus predictis, constituit se possidere, donec ipsius rei possessionem acceperit, vel acceperint, corporalem, quam accipiendi eius, vel eorum auctoritate, in casibus predictis, eidem donatario, stipulanti nominibus supradictis, licentiam omnimodam dedit, promictens eidem de re predicta, vel eius occasione et fructibus predictis, predicto Fratri Thomassutio, stipulanti ut supra, litem vel controversiam eidem non inferre, nec inferenti consentire, sed rem predictam eidem, stipulanti ut supra, ab omni homine et universitate etc. etc. defendere etc. etc.

Actum in dicto loco Fratrum heremitarum S.ti Augustini de prope Eugubium, sub porticis dicti loci, presentibus Filippo Bagii Cecchi et Iohachino Petri Cecchi Tiri, de quarterio S.ti Andree, et Iohanne Sensutii Cambii de quarterio S.ti Petri de Eugubio, testibus ad predicta vocatis et rogatis, se asserentes cognoscere partes et mihi Notario notas.

Et Ego Veraginus Iohannis de Eugubio, imperiali auctoritate Notarius et Iudex ordinarius, predictis omnibus et singulis interfui, rogatus scripsi et publicavi et meum signum apposuit consuetum. Signum Notarii.