Oblatio D.nae Nesinae, filiae olim Manutii Iohannis Gnoli

[21 ottobre 1416]

 

Cod. Eugub., fol. 79-79v, orig. Arch. Commun. Eugub., fondo Armanni, Busta D. 4, n. 35, copia chart., fol. 2

 

 

 

In nomine Domini nostri Iesuchristi. Amen. Anno a nativitate eiusdem Millesimo CCCC XVI, Indictione VIIII, apostolica Sede vacante, die XXI mensis Octobris. Actum in sacristia loci S.ti Agustini de extra et prope Eugubium, presentibus fratribus Honofrio Filippi de Eugubio et Andrea Guidi Nicolutii de Castro Cantiane, communitatis Eugubii, fratribus loci Sancti Francisci de Eugubio, testibus ad hec habitis et rogatis. D.na Nesina, filia quondam Mannutii Iohannis Gnoli de Eugubio et quarterio S.ti Petri, non seducta, sed sua propria et expontanea voluntate, volens saluti anime sue et sui patris providere et adtendens in posterum regulare residuum vite sue, et affectans vitam suam finire sub regula beati Agustini et servire omnipotenti Deo et beate et gloriose Virgini Marie, matri eius, et beato Agustino pro oblata, existens genuflexa coram venerabili et religioso viro fratre Paulutio ... de Eugubio, priore provintiali provintie Vallis Spoleti, iunctis manibus, tenens manus suas intra manus dicti prioris provintialis, oculis mentis levatis, octulit (sic) se et omnia sua bona omnipotenti Deo et beate et gloriose Virgini Marie, matri eius, et beato Agustino et omnibus sanctis et dicto priori provintiali, presenti et stipulanti vice et nomine Magistri Petri de Vena, prioris generalis totius Ordinis S.ti Agustini, et ipsius prioris provintialis dicti loci et suorum subcessorum et capituli et conventus dicti loci S.ti Agustini. Et promisit et convenit dicto priori provintiali, presenti et stipulanti nominibus quibus supra, obedientiam et reverentiam et vivere secundum regulam beati Agustini toto tempore vite sue, huis condictionibus et pactis, habitis, firmatis et expresse declaratis inter ipsas partes: quod ipsi D.ne Nesine liceat et licitum sit pro suo libitu voluntatis, quamdiu vixerit in humanis, de fructibus et obventionibus bonorum singulorum et massaritiarum dicte D.ne Nesine disponere et in fine, dum expleverit cursum suum, ipsa bona sint et esse intelligantur appricata (sic) et dedicata capitulo et conventui dicti loci S.ti Agustini. Ac etiam voluit et declaravit dicta D.na Nesina quod, si contingerit D.nam Francischam, eius matrem, vivere post mortem ipsius D.ne Nesine, quod fratres, capitulum et conventus dicti loci S.ti Agustini teneantur et debeant, quolibet anno, in vita sua tantum, dare et tradere duas salmas grani et quatuor salmas vini. Et si dicta D.na Francisca vellet aliquando ire ad potere dicte D.ne Nesine, positum in villa Catignani, communitatis Eugubii, quod ipsa possit et sibi liceat absque aliqua contradictione fratrum dicti loci S.ti Agustini vel alterius persone, et eo uti ad libitum voluntatis. Et quod fratres, capitulum et conventus dicti loci S.ti Agustini non possint nec valeant ullo tempore, aliquo modo, dictum potere vendere nec alienare nec in alium transferre; quod si contrarium fecerint, voluit dicta D.na Nesina dictum potere devenire, ipso facto, ex nunc, ad fratres, capitulum et locum S.ti Dominici de Eugubio. Et si dicti fratres, capitulum et conventus loci predicti S.ti Dominici ipsum potere venderent vel alienarent aut modo aliquo permutarent, quod, ex nunc prout ex tunc, dictum potere deveniat et devenire debeat in hospitali Sancte Marie de Caritate de extra et prope Eugubium. Qui frater Paulutius, prior provintialis predictus, tenens dictam D.nam Nesinam manus intra manus suas, recepit eam, nominibus quibus supra, et aceptavit ipsam D.nam Nesinam in oblatam et pro oblata dicti loci et Ordinis predicti, dicens dicte Domine: Ego recipio te atque acepto pro oblata, et quod tu deinceps sis particeps omnium missarum ieiuniorum, vigiliarum, orationum et paupertatum, hobedientiarum (sic), laborum et abstinentiarum et ceterorum bonorum, que per fratres dicti Ordinis fieri consueverunt. Rogans me, Notarium infrascriptum, ut de predictis publicum conficerem instrumentum.

Et ego, Thomassutius Marini de Eugubio, publicus imperiali auctoritate Notarius et Iudex ordinarius, predictis omnibus et singulis suprascriptis presens interfui et ea rogatus scribere, scripsi et publicavi et signum meum apposui. Signum Notarii.