Laudum seu sententia arbitralis Mag. Fr. Gabrielis de Spoleto et Antonini Ser Johachini de Eugubio in lite inter Conventum S.ti Augustini et Ser Salinguerra Ser Cinti de Eugubio

[e 1425]

 

Cod. Eugub., fol. 80-82v. Orig.

 

 

 

Nos Gabriel de Spoleto, Sacre teologie Magister, frater Ordinis heremitarum S.ti Agustini, et Antoninus Ser Iohachini de Eugubio, arbitri et arbitratores et amici communes et amicabiles compositores positi et electi a fratre Gregorio Manni, fratre loci S.ti Augustini de extra et prope Eugubium, sindico et procuratore Fratrum, Capituli et Conventus dicti loci S.ti Agustini, specialiter constituto ad talem actum manu mey Thomassutii, Notarii infrascripti, ex una parte, et a Ser Sallinguerra Ser Cintii de Eugubio, ex altera parte, de omni lite et quaestione que esset vel esse posset inter ipsas partes nomine et occaxione quarumcumque pecuniarum el rerum perventarum ad manus dicti Ser Sallinguerre, spectantium ad dictum locum et fratres predictos; et etiam nomine et occaxione cuiusdam vinee evicte olim dicto Ser Sallinguerre, ad cuius defensionem tenebatur Mag. Benedictus, olim frater dicti loci, ut ipse Ser Sallinguerra asseruit et asserit, et quacumque alia ratione, occasione vel causa; et nomine et occaxione quarumcumque aliarum rerum, quas una pars alteri et altera alteri dicere, petere seu causari posset, quacumque ratione, occaxione vel causa, usque in diem dicti compromissi, prout de compromisso in nos facto plenius et latius constat manu Ser Thomassutii Marini de Eugubio, Notarii. Unde viso dicto compromisso et visis iuribus et allegationibus iurium partium predictarum, coram nobis productis et allegatis; et visis probationibus factis hinc inde ac etiam confessionibus ipsarum partium coram nobis factis; et visa veritate facti et omnium in nos compromissorum inter partes predictas; et omnibus visis et consideratis que videnda et consideranda fuerunt, viam arbitratorum eligentes, Christi nomine iterum invocato, talem sententiam, laudum et arbitramentum atque declarationem inter dictas partes damus et proferimus in hiis scriptis et in hunc modum, videlicet: Quia dicimus, pronumptiamus, declaramus, arbitramur et arbitramentamur hoc modo, videlicet: Quod dictus Ser Sallinguerra dimictat et relapxet et dimictere et relapxare teneatur dictis fratribus, capitulo et conventui dicti loci S.ti Agustini res infrascriptas et infra contentas et confinatas, et quamlibet earum, tenendas et possidendas per dictos fratres, capitulum et conventum predictum iure dominii, vel quasi. Et quod dictus Ser Sallinguerra non teneatur dictis fratribus et conventui dicti loci ad aliquam defensionem dictarum infrascriptarum rerum, nisi de suo dato et facto tantum et ab illis personis, quibus dicte infrascripte res essent vel apparerent obligate ex aliquo contractu vel obligatione initis et factis a dicto Ser Sallinguerra, et non in aliis casibus quam predictis. Et quod dictus Ser Sallinguerra teneatur cedere et concedere, transferre et mandare, sine aliqua solutione, dictis fratribus, capitulo et conventui dicti loci omnia iura, omnesque actiones reales et personales, utiles et directas, tacitas et expressas, que et quas habet et sibi competunt vel competere possent contra autores suos et quemlibet eorum, qui dicto Ser Sallinguerre vendiderint dictas infrascriptas res, nomine et occaxione promissionis de legitima defensione dictarum infrascriptarum rerum, facta eidem Ser Sallinguerre per dictos suos auctores manu Ser Bartolomey Ser Angeli et Ser Filippi Matioli de Eugubio, Notariorum, vel manu cuiuscumque alterius Notarii appareret. Item, quod dictus Ser Sallinguerra teneatur dare et solvere Fratri Massarello Pauli, fratri dicti loci, quolibet anno, hodie incipiendo, unum florenum auri, donec dictus frater Massarellus fuerit promotus ad gradum lectorie. Et in quantum non studuerit in studio generali dictus frater Massarellus, dictus Ser Sallinguerra dictum florenum, pro tempore quo non studuerit, eidem solvere non teneatur. Item, laudamus et arbitramur, et per hanc nostram sententiam, declarationem et laudum et arbitramentum liberamus et absolvimus dictas partes et absolutas reddimus ab omnibus aliis et singulis et ab omni eo et toto quod una pars alteri et altera alteri dicere, petere seu causari posset nomine et occaxione contentorum in dicto compromisso in nos facto et de dependentibus et emergentibus ab eodem, et ab omnibus et singulis aliis, que dicte partes ad invicem sibi dicere seu causari possent, cum scriptura vel sine scriptura, quacumque ratione, occaxione vel causa, usque in presentem diem, remanentibus tamen firmis omnibus et singulis suprascriptis per nos laudatis, declaratis et arbitratis. Item, laudamus, sententiamus, declaramus et arbitramur, ob iustas et rationabiles causas nostrum animum moventes, quod fratres, capitulum et conventus dicti loci teneantur et sint obbigati dare et solvere quolibet anno dicto fratri Massarello, quo studuerit quousque efficietur lector, vel gradum lectorie adipiscetur, duos florenos auri de fructibus percipiendis ex dictis possessionibus infrascriptis per dictum conventum et fratres predictos. Et predictos duos florenos solvere teneantur dicto fratri Massarello in quantum ipse frater Massarellus studuerit et ad studium generale permanserit, quousquc lector efficiatur, et aliter non teneantur dicti fratres ad predictam solutionem (fratri) Massarello. Et predicta dicimus, laudamus, sententiamus, declaramus, arbitramur et arbitramentamur vigore nostri arbitrii et omni modo, via, iure et forma quibus magis et melius de iure possumus et debemus, mandantes predicta per dictas partes inviolabiliter observari, sub pena et ad penam in dicto compromisso contentam. Res de quibus supra fit mentio sunt hec, videlicet: Medietas unius poteris, cum medietate domorum in eo existentium, pro indiviso pro alia dimidia cum Ser Matheo Buchielli de Eugubio. Quod potere positum est in comitatu Eugubii, in Villa Fugnani et Buffiani cum confinibus et infra confinia, prout patet in instrumento emptionis facte de dicta medietate dicti poteris per dictum Ser Sallinguerram, seu alium eius nomine, a dicto Ser Matheo Buchelli manu Ser Bartolomei Ser Angeli de Eugubio, Notario. Item, unum petium terre positum in villa S.ti Angeli de Costa, comitatus Eugubii, in vocabulo murale, fines cuius: ab uno, via; ab alio, res dicti Ser Sallinguerre; et ab alio, res Magistri Baldasaris Guasparis Marescalchi; et ab alio, res Johannis Manutii alias Cafforiti; emptum olim per dictum Ser Sallinguerram a Petrutio Samonis, alias dicto Ciocio de Eugubio, manu Ser Filippi Matioli de Eugubio, Notarii. Salvo tamen et reservato in omnibus et singulis suprascriptis iure Communis Eugubii secundum formam statutorum et ordinamentorum ac legum municipalium Communis predicti. Et hoc presentibus et intelligentibus fratre Gregorio Manni, fratre Ierolimo Magri Tadei et fratre Iohanne Bartolomei, fratribus et sindicis dicti loci et dicto Ser Sallinguerra Ser Cintii et amologantibus, confirmantibus et approbantibus laudum et arbitramentum predictum et omnia et singula in eo contenta. Latum, datum, pronumptiatum et promulgatum fuit supradictum laudum, sententia et arbitramentum per supradictos Magistrum Gabriellum et Ser Antoninum, arbitros et arbitratores predictos, pro tribunali sedentes in quodam banco ligneo, sito in cella fratris Ierolimi supradicti, sita in dormitorio dicti loci S.ti Agustini, sub anno Domini Millesimo CCCC XXV, indict. III, tempore D.ni Martini Pape quinti, die XVIIII Martii, presentibus supradictis fratribus Gregorio, Ierolimo et Iohanne et dicto Ser Sallinguerra et amalogantibus ut supra, et presentibus Nicolao Magistri Bartoli Magistri Christofari et Antonio, filio dicti Nicolai de Eugubio et quarterii S.ti Andree, testibus ad predicta habitis et rogatis. Executio Laudi Supradictis anno, indictione, die, loco et testibus supra scriptis. Ser Sallinguerra Ser Cintii predictus, per se et suos heredes, salvo tamen et expresse reservato iure Communis Eugubii secundum formam statutorum et ordinamentorum ac legum municipalium Communis predicti, et vigore supradicti laudi sive declarationis et arbitramenti, et volens parere supradicto laudo sive declarationi et arbitramento, dedit, cessit, concessit, transtulit et mandavit Fratribus Gregorio, Ierolimo et Johanni, fratribus et sindicis predictis, presentibus, stipulantibus et recipientibus vice et nomine dicti capituli et conventus dicti loci S.ti Agustini et pro ipso capitulo et conventu predicto, omnia iura et actiones reales et personales, utiles et directas, tacitas et expressas, que et quas dictus Ser Sallinguerra habet et habere posset et sibi competunt et competere possent contra et adversus dictum Ser Matheum et dictum Petrutium, alias Ciocio, et quemlibet eorum, nomine et occasione promissionum factarum per eos et quemlibet eorum eidem Ser Sallinguerre de legitima defensione dictarum rerum et earum evictione et cuiuslibet earum manu Ser Filippi et Ser Bartolomei, Notariorum predictorum, ponens dictus Ser Sallinguerra dictos fratres et sindicos predictos, dictis nominibus, in locum suum et ipsorum procuratorum (sic) constituens, ut in rem suam; ita quod admodo actionibus utilibus et directis et quibuscumque aliis possint contra dictos Ser Matheum et Petrutium, et quembibet eorum, nomine et occaxione dictarum promissionum, de legitima defensione et evictione dictarum rerum possint contra dictos Ser Matheum et Petrutium, et quembibet eorum, et eorum et cuiuslibet ipsorum heredes et bona, nominibus et occaxionibus predictis, agere et experiri, excipere et replicare, consequi et se tueri, et omnia et singula facere et exercere, que ipsemet cedens facere poterat ante presentem cessionem et concessionem; promictens dictus Ser Sallinguerra quod dicta iura nemini alii dedit nec concessit, in totum neque in partem, nec in futurum cedet nec concedet, et si contrarium apparuerit, vel apparebit, promisit ipsos fratres, capitulum et conventum omni tempore indempnem et indempnes conservare et ipsa iura reacquirere omnibus ipsius Ser Sallinguerre sumptibus et expensis. Renumptians dictus Ser Sallinguerra exceptioni dict. cessionis et concessionis non factarum et promissionis non facte et rei sic non geste, exceptioni doli, mali, condictionis sine causa, informationi et omni alii iuris et legum auxilio, sibi in hoc facto modo aliquo competenti vel competituro. Quam cessionem et concessionem et omnia et singula suprascripta promisit dictus Ser Sallinguerra et promictendo iuravit ad sancta Dei evangelia, manu tactis corporaliter scripturis, firma et rata hahere et tenere, adtendere et observare, facere et adimplere et in nullo contrafacere vel venire, per se vel alium seu alios, aliqua ratione, occaxione vel causa, de iure vel de facto, sub pena et ad penam centum florenorum auri et obligatione omnium suorum bonorum, presentium et futurorum, solempni et legitima stipulatione promissa. Qua pena soluta vel non, predicta omnia et singula perpetuo rata sint et firma.

Et Ego Thomassutius Marini de Eugubio, publicus imperiali auctoritate Notarius et Iudex ordinarius, predictis omnibus et singulis presens interfui et ea rogatus scribere scripsi et publicavi, et meum signum apposui. Signum Notarii.