Nova oblatio D.ne Nesine quond. Mannutii Iohannis Gioli de Eugubio

[15 novembre 1430]

 

Cod. Eugub., fol. 83. Original. Iam antea, hoc est an. 1416, mens. septemb. 21, haec ipsa D.na Nesina oblationem sui et bonorum suorum fecerat in manibus Fr. Pauli, Provincialis Provinciae Vallis Spoleti. Cf. docum. n. LXXXIX. Cur noviter hanc oblationem fecerit et qua ratione de prima oblatione sermo non sit factus in hoc instrumento lectorum perspicacitati inquirendum relinquimus.

 

 

 

In nomine Domini, Amen. Anno Domini Millesimo CCCC XXX, indictione octava, tempore Dni. Martini, Pap. quinti, die XV mensis Novembris. Actum in loco S.ti Augustini de prope Eugubium, iuxta altare mangnum conventus, presentibus Ser Iacobo et Simone, filiis Iohachini Petri, et Nicolao Iohannis de Tur(r)ita, Comitatus Perusii, habitante Eugubii, in Burgo S.ti Agustini, testibus ad hec habitis et rogatis et michi, Notario infrascripto, notis. Domina Nesina quondam Mannutii Iohannis Gioli de Eugubio et quarterio S.ti Petri, non vi, non dolo nec subsgestione vel renumptia alicuius, sed sua propria libera et spontanea voluntate, et non per errorem, de qua obligatione diu deliberavit et maturo consilio, cum bono et claro intellectu, volens saluti anime sue et remissioni suorum peccatorum providere, et intendens in posterum regulare residuum vite sue, et affectans vitam suam finire sub Regula beati Augustini, et omnipotenti Deo et beate et gloriose Virgini Marie, eius matri, et beato Augustino servire pro oblata; existens genuflexa coram Religioso et honesto viro fratre Nofrio Filippi de Eugubio, Priore dicti loci fratrum heremitarum S.ti Agustini, oculis mentis levatis, sponte, pure et simpliciter, sine aliqua contradictione, tacita vel expressa, ab homine vel a lege, intelligenda vel subaudienda, octulit se et omnia sua bona, mobilia et immobilia, irrevocabiliter et in perpetuum, omnipotenti Deo et gloriose Virgini Marie, matri eius, et beato Agustino et omnibus Sanctis et dicto Priori, presenti et stipulanti vice et nomine Prioris generalis dicti Ordinis et ipsius Prioris dicti loci et suorum subcessorum et Capituli et conventus dicti loci S.ti Agustini. Et promisit et convenit dicto Priori, presenti et stipulanti, nominibus quibus supra, hobedientiam, reverentiam et castitatem et vivere sine proprio secundum Regulam beati Agustini toto tempore sue vite. Supplicans ipsi Priori ut ipsam et bona predicta in oblatam recipiat pro dicto loco et capitulo et conventu predicto. Qui Fr. Nofrius, Prior predictus, dicta oblatione facta et supplicatione predicta plenius intellecta, videns et considerans ipsam fore utilem et necessariam loco predicto S.ti Agustini quoad personam offerentis et bona que octulit et concessit, dictam D.nam Nesinam et eius bona in oblationem predictam recepit et acceptavit pro dicto loco, capitulo et conventu predicto, dicens dicte D.ne Nesine: Ego te, nominibus quibus supra, recipio atque acepto in oblatam et pro oblata, et quod tu deinceps sis particeps omnium missarum, ieiuniorum, vigiliarum, orationum, paupertatum, hobedientiarum, laborum et abstinentiarum, ceterorumque bonorum, que per fratres dicti Ordinis fieri concesserit D.nus noster Ihesus Christus per universum mundum, ad salutem anime tue et pro remissione tuorum peccatorum, in nomine D.ni nostri Ihesu Christi. Que D.na Nesina incontinenti post hoc, constituit se dicta omnia sua bona oblata nomine dicti loci et ordinis S.ti Agustini possidere. Rogantes me, Notarium infrascriptum, ut de predictis publicum conficerem instrumentum. Salvo tamen et semper reservato in omnibus supradictis iure Communis Eugubii, secundum formam statutorum et ordinationum ac legum municipalium Communis predicti.

Et Ego Thomassutius Marini de Eugubio, publicus imperiali auctoritate Notarius, predictis omnibus et singulis interfui et ea rogatus scribere scripsi et publicavi et meum signum apposui. Signum Notarii.