Eugubinus conventus licentiam concedit fratri Ioanni de Eugubio ut possit dimittere, ad usum tantum, fratri Bartholomaeo, novitio, eius nepoti, omnia sua bona mobilia et immobilia

[10 dicembre 1439]

 

Cod. Eugub., fol. 59. Originale

 

 

 

Frater Honofrius de Eugubio supra inter praesentes Capitulo non nominatur; desunt e contra subscriptiones fratris Augustini de Eugubio et fratris Erculani Ugolini de Perusio. In loco, in quo documentum hoc est scriptum, primitus aliud scriptum erat, quod fuit abrasum, et cuius aliqua adhuc remanent vestigia. Sed ex his intelligi nequit cuius generis illud scriptum fuerit Notum sit omnibus presentes litteras inspecturis, qualiter congregato et coadunato capitulo fratrum et conventus S.ti Augustini de extra et prope muros civitatis Eugubii, in quo capitulo interfuerunt infrascripti fratres, videlicet: frater Christoforus N. de Eugubio, prior; Magister Ugolinus de Amelia, frater Massarellus N. de Eugubio, bachalarius; frater Augustinus de Nunsia, lector; frater Ambrosius N. de Eugubio, lector; frater Andreas de Eugubio, frater Salvator Bindi de Monte Ilcino, frater Augustinus N. de Eugubio, frater Victorius Ricardutii de Eugubio, frater Nicholaus de Pergula, frater Erculanus Ugolini de Perusio, non dolo, non fraude nec aliqua alia inhonesta causa, sed ex certa et vera scientia, bonum solummodo respicientes conventus, deliberaverunt, ordinaverunt atque fecerunt et plenam licentiam dederunt fratri Iohanni de Eugubio, fratri dicti conventus, (ut) posset dimictere, ad usum tantum, fratri Bartholomeo, novitio, nepoti dicti fratris Iohannis, omnia bona mobilia seu immobilia, excepto uno missali, seu missalibus, si tot reperirentur, quod vel que habeat seu habeant devenire immediate ad conventum; hoc, tamen, adito, ut dictus frater Bartholomeus, et nunc novitius, non gaudeat nec gaudere possit dictis bonis, nisi pro illo tempore in quo manebit in Ordine fratrum heremitarum S.ti Augustini, et aliter non. In cuius rei testimonium hanc litteram communi voto Prior et fratres supra nominati scribere fecerunt et sigillo conventus et fratrum manibus muniri.

Datum Eugubii (anno) Domini 1439, die 10 decembris.

Ego frater Ugolinus de Amelia, Magister indignus, confirmo supradicta - Ego frater Massarellus, bachalarius indignus, confirmo supradicta - Ego frater Christoforus, prior indignus, confirmo supradicta - Ego frater Honofrius de Eugubio, confirmo omnia supradicta - Ego frater Ambrosius de Eugubio confirmo omnia supra dicta - Ego frater Augustinus de Nursia, lector, confirmo omnia supra dicta - Ego frater Salvator de Monte Ilcino confirmo supra dicta - Ego frater Andreas confirmo supradicta - Ego frater Victorius de Eugubio confirmo superius dicta - Ego frater Nicolaus de Pergula, conventualis, confirmo supradicta.