Oblatio D.nae Marinellae, uxoris olim Iohannis Gilie de Eugubio

[27 agosto 1445]

 

Cod. Eugub., fol. 83v-84. Originale

 

 

 

In nomine Christi, Amen. Anno Domini Millesimo CCCC XLV, indictione VIII, tempore SS.mi in Christo P.ris. et D.ni Eugenii divina providentia Pape quarti, die XXVII mensis Augusti. Actum Eugubii, in quarterio S.ti A(ndree), in domo infrascripte Domine et habitationis ipsius, cuius fines a duobus vie publice; ab alio, Paulus Marci, alias Dompni Pelegri; presentibus fratre Christoforo Petrutii, fratre Sperandeo Aldrovandi de Eugubio, fratre Salvatore Bindi de Monte Alcino et fratre Caspare Martini de Sigillo, comitatus Visii, testibus ad hec habitis, vocatis et rogatis. D.na Marinella, uxor olim Iohannis Gilie et nunc uxor Ricardutii ..., dicto dala Mole et de Eugubio, et quarterio S.ti A(ndree), cum presentia, licentia et consensu et voluntate dicti Ricardutii, sui viri, omnibus et singulis infrascriptis sibi consentientis, licentiam et parabolam dantis, non vi, non dolo neque metu nec alia sugestione vel renumptia alicuius, sed sua propria libera et spontanea voluntate, et non per errorem, deliberavit et maturo consilio intra se, exposuit, cum bono et claro intellectu, volens saluti anime sue et remissioni peccatorum suorum providere, ut alias deliberavit, et volens atque intendens in posterum regulare residuum vite sue et affectans vitam suam finire sub regula beati Augustini et omnipotenti Deo et Beate et gloriose Virgini Marie, eius matri, et beato Augustino servire pro oblata, existens infirma in lecto et inclinato capite coram Religioso et honesto viro fratre Massarello quondam Pauli, Magistro in sacra pagina et loci fratrum S.ti Augustini heremitarum de Eugubio, oculis sue mentis levatis, sponte, pure et simpliciter, sine aliqua contradictione, tacita vel expressa, ab homine vel a lege, intelligenda vel subaudienda, ottulit se et omnia sua bona mobilia et immobilia, inrevocabiliter et in perpetuum, omnipotenti Deo et gloriose Virgini Marie, matri eius, et Beato Augustino et omnibus Sanctis et dicto Magistro Massarello, presenti, stipulanti et recipienti vice et nomine prioris generalis dicti ordinis et ipsius Magistri Massarelli, fratris et Magistri predicti et prioris dicti sui loci et successorum ipsorum et capituli et conventus loci predicti. Et promisit et convenit dicto fratri et Magistro Massarello, presenti, stipulanti et recipienti nominibus predictis, hobedientiam, reverentiam et castitatem et vivere sine proprio, secundum regulam beati Augustini, toto tempore sue vite. Supplicans ipsi Magistro Massarello, nominibus predictis, ut ipsam et omnia sua bona predicta in oblatam recipiat pro dicto loco, capitulo et conventu. Qui frater et Magister Massarellus, nominibus predictis, dicta oblatione facta et supplicatione predicta plenius intellecta, videns et considerans ipsam fore utilem et necessariam loco predicto S.ti Augustini, quoad personam offerentis et bona que optulit et concessit, dictam D.nam Marinellam et eius bona in oblatam predictam recepit et acceptavit pro dicto loco, capitulo et conventu, dicens dicte D.ne Marinelle: Ego te, nominibus quibus supra, recipio atque accpio in oblatam et pro oblata et quod tu deinceps sis particeps omnium missarum, ieiuniorum, vigiliarum, orationum, paupertatum, hobedientiarum, laborum et abstinentiarum, ceterorumque bonorum, que per fratres dicti ordinis fieri concesserit Dominus noster Ihesus Christus per universum mundum, ad salutem anime tue et pro remissione omnium et singulorum tuorum peccatorum.

In nomine Domini nostri Ihesu Christi, Amen. Que D.na Marinella, incontinenti post hec, constituit se et omnia sua bona oblata nomine dicti loci et ordinis S.ti Augustini possidere. Rogantes me, Notarium infrascriptum, ut de predictis publicum conficerem instrumentum. Salvo et semper reservato iure Communis Eugubii, secundum formam statutorum et reformationum Communis Eugubii in omnibus et singulis suprascriptis.

Et Ego Francischus quondam Tomassutii Nicolutii de Eugubio, publicus imperiali auctoritate Notarius et Iudex ordinarius, predictis omnibus et singulis presens interfui, rogatus scripsi et signioque (sic) meo signiavi, ad finem predictorum. Signum Notarii.