D.na Ierolima, uxor q. Tomasi Pauli, donavit Patri Mag. Massarello Pauli, nomine Conventus, unum tenimentum terrae

[9 ottobre 1450]

 

Cod. Eugub., fol. 85. Originale

 

 

 

In nomine Christi, Amen. Anno Domini Millesimo CCCCL., indict. XIII, tempore SS.mi in Christo Patris et D.ni D.ni Nicholay, divina providentia Pape quinti, die nona mensis octubris. Actum in Sacristia Eglesie S.ti Augustini de extra et prope Eugubium, presentibus fratre Christoforo q. Petrutii, fratre Sperandeo Aldrovandi, fratre Victorio q. Ricardutii, fratre Petrutio q. Nicholay Petri et fratre Ambrosio q. Simonis Tarchelli de Eugubio, testibus ad infrascripta vocatis, habitis et rogatis. D.na Ierolima, uxor q. Tomasi Pauli, alias Pigniatte, de Eugubio et quarterio S.ti Andree, per se et suos heredes, si proprium iure proprio et in perpetuum, seu libelarium, salvo iure pensionis et renovationis cuiuscumque mon(asterii) esset proprietas, et salvo semper et reservato iure Communis Eugubii pro datis, impositis et aliis honeribus et factis dicti Communis Eugubii, secundum formam statutorum et ordinationum ipsius Communis Eugubii, titulo donationis irrevocabiliter, inter vivos, dedit, donavit, tradidit, cessit et concessit Fratri ac Mag. Massarello q. Pauli Pauli, fratri dicti loci, presenti, stipulanti et recipienti vice et nomine fratrum, capituli et conventus dicti loci S.ti Augustini de extra et prope Eugubium, unum tenimentum terre, partim vineatum et partim laboratum, cum quadam casella in eo existente, positum in Villa Categniani, comitatus dicte civitatis Eugubii, cuius fines: ab uno, res Adionis Ser Iohannis de Brescia; ab aliis duobus, vie publice; ab alio, res olim Baldini Nini; ab alio, res dicti Adionis, sive Monasterium S.ti Petri de Eugubio; cum predictis finibus vel aliis, si quos dicta res donata habet plures et veriores aut meliores confines. Ad habendum, tenendum et possidendum et quicquid dictis fratribus, capitulo et conventui perpetuo placuerit perpetuo faciendum; cum introitibus et exitibus suis, usu et usuariis usque in vias publicas, omnique iure et actione, usu seu requisitis ipsi rey donate modo aliquo pertinente, seu spectante; et promixit dictam rem donatam dictis fratribus, capitulo et conventui ullo unquam tempore molestare, nec molestanti consentire, sed iure et usu ab omni homine, persona, collegio, universitate, omnibus ipsius D.ne Ierolime sumtibus et expensis defendere et guarentare et liberam, vacuam et expeditam possessionem ipsius rey donate tradere dictis fratribus, capitulo et conventui. Cum hac condictione: quod ullo unquam tempore possit vendi nec alienari, nec modo aliquo permutari, sed semper et perpetuo permanere debeat predictis fratribus, capitulo et conventui.

Et si contrafactum fuerit vel contrafecerint, cadant a dicta donatione et deveniat et devenire debeat ad Hospitale S.te Marie de Caritate, alias Iunte; ad Hospitale S.te Marie de Mercatali et ad Hospitale novum Fraternitatis disciplinatorum Crucifixi vocati S.ti Augustini de Eugubio pro nubendis tribus puellis; et, si contigerit ipsos seu aliquos ipsorum consentire alienationi fiende de dicto tenimento terre, tunc devenire voluit, titulo predicto, eglesie catedrali Eugubii, Conventui S.ti Dominici, Conventui S.ti Francisci et Conventui S.te Marie Servorum de Eugubio. Et hoc fecit dicta Domina donatrix quia sic facere sibi bene placuit et pro remissione omnium et singulorum suorum peccatorum. Renumptians dicta donatrix exceptioni dicte donationis, cessionis et concessionis non facte, rey non sic geste vel aliter geste beneficio, vel eam autentice, si qua mulier, et omnibus aliis suis beneficiis, certificata a me, Notario infrascripto, quid sua beneficia dicant et quid importent. Quae omnia et singula suprascripta promisit dicta D.na Ierolima et promictendo iuravit ad sancta Dey evangelia, manibus corporaliter tactis scripturis, perpetuo rata et firma habere, tenere, et observare, facere et adimplere et in nullo contrafacere vel venire aliqua ratione, occasione vel causa seu ingenio, de iure vel de facto, sub pena dupli dicte quantitatis et obligatione omnium et singulorum suorum bonorum, presentium et futurorum; qua pena soluta vel non, rato manente contractu.

Et Ego Francischus q. Tomassutii Nicholutii de Eugubio, publicus imperiali auctoritate Notarius et Iudex ordinarius, predictis omnibus et singulis presens interfui, rogatus scripsi et publicavi et signo meo signiavi ad fidem predictorum. Signum Notarii.