Decretum Capituli Provincialis Provinciae Vallis Spoleti, anno 1468 Vissi celebrati, circa venditionem factam seu tentatam per Conventum Eugubinum quarundam domorum

[6 giugno 1468]

 

Arcbiv. Commun. Eugub., Fondo Armanni, Busta IV, D. 4, n. 35, 2 fol. sign. nn. 139, 140, chartac. originale

 

 

 

Fr. Gregorius de Interande, Sacre Pagine Magister, Vicarius R.mi P. Generalis in Capitulo nostro provinciali Vissi celebrato, una cum diffinitoribus eiusdem Capituli, in dicto loco celebrati, provincie Vallis Spoleti et Ordinis fratrum heremitarum S.ti Augustini. Venerabil. nobis in Christo dilectis Priori, ceterisque fratribus nostri Conventus de Eugubio, eiusdem Ordinis et provincie, Salutem in Domino eternam. Audivimus dignorum fide relatione, quod aliqui ex fratribus ipsius conventus temere presumpserint verbis promissoriis, sub spe emptionis seu venditionis, tradere domos quasdam spectantes ad prelibatum conventum pleno jure, vigore successionis, ex testamento quondam Nicholai Melchioris de Eugubio, nec capitulariter fratribus ipsius conventus congregatis ad sonum campanelle, nec cum licentia prioris provincialis, ut nostre sanctiones mandant; ymmo, quod deterius est, absque preconum proclamatione, in preiudicium dicti conventus. Volentes, igitur, de oportuno remedio providere, prout ex nostro officio merito obligamur, intendentes ad ea que spectant ad utilitatem et famam prelibati nostri conventus Eugubini; presentium igitur in tenore, vobis omnibus, in meritum sancte obedientie et sub pena rebellionis et privationis vocis active et passive, precipimus et mandamus, quatenus de dicta asserta verbosa promissione nullum venditionis atque alienationis instrumentum conficere audeatis, seu presumatis; ymmo, mandamus vobis, sub eadem pena, ut dictas domos ad dominium, proprietatem atque possexionem ipsius conventus omnino et penitus, quam citius, reducatis. Alioquin contra vos fulminabimus, ut iura expostulant, declarantes harum serie litterarum, vestras promissiones, si que fuerunt, quod non credimus, fuisse frivolas et vanas, nulliusque roboris vel momenti, obstantibus nostri Ordinis sanctionibus atque iuribus tam canonicis quam civilibus (sic).

Datum in diffinitorio nostri Capituli Vissi celebrati die VI mensis Junii 1468, nostri officii ipsius diffinitorii sub sigillo atque Vicarii et diffinitorum manuum subscriptione.

Ego Mag. Gregorius de Interande, Vicarius supradictus confirmo supradicta. - Ego Mag. Gratianus de Fulgineo, provincialis, confirmo supradicta. - Ego fr. Andreas de Monteregali, Mag., supradicta confirmo. - Ego fr. Boetius de Narnia, Mag., confirmo supradicta. - Ego fr. Iacobus de Mevania, biblicus, confirmo supradicta. - Ego fr. Augustinus de Visso confirmo supra dicta. Sigillum.