Appellatio fratris Gregorii Ioannis, prioris Conventus Eugubini S.ti Augustini ad R.mum. P. Generalem Ordinis contra quasdam litteras fratris Felicis de Interanne, Provincialis Provinciae Vallis Spolet

[11 dicembre 1490]

 

Archiv. Commun. Eugub., Fondo Armanni, Busta 35, chart. origin., 4 fol. sign. nn. 25-28

 

 

 

Coram vobis egregiis dominis Berardino d.ni Polidori et Ceccholo Baldi, civibus honestis et fame integerrime. Honestus et religiosus vir frater Gregorius, quondam Iohannis, Eugubinus civis et frater Sancti Augustini, Ordinis heremitarum de Eugubio, Prior Conventus dicte ecclesie, dicit et querelanter exponit et narrat: quomodo die dominica proxime preterita intimate sibi fuerunt littere tenoris et continentie infrascripte. Et nedum preceptorie sibi, sed etiam ceteris fratribus dicti Conventus, sigillate sigillo maiori provincie, sive R.di sacre pagine Magistri Felicis de Interanne, benemerito provincialis provincie Vallis Spoletane. Dicentes quod dicte littere sine iusta causa fuerunt edite pro parte prefati R.di patris provincialis predicti. Qui, non visis, non auditis et non consideratis juribus dictorum fratrum et conventus predicti Eugubini, dictas preceptorias litteras fulminavit. Quod facere non potuit nec debuit. Et quia a predictis preceptis, comminationibus et in eis contentis dictus Prior et fratres sentiunt se gravatos et magis in futurum gravari possunt, saltem de facto; ideo, petita et repetita instanter et instantissime presentia prefati provincialis et ipsa non inventa; ideo, in bis scriptis provocant, recurrunt et appellant ad R.mum in Christo patrem et domimum sacre pagine professorem Mag. Ambrosium de Cora, Generalem benemeritum totius Ordinis heremitarum generalem, et ad quemlibet alium Judicem competentem. Petentes eis apostolos dari et iterum dari instanter et instantissime, et item cum instantia a dicto venerando provinciali, licet absente submittentes se proteptioni (sic) prefati Generalis et cuiuslibet alterius Judicis competentis. Protestantes quod huiusmodi appellationis et nullitatis causa pendentibus, nihil novi fiat, ad penam juris. Frater Felix de Interanne, sacre Theologie professor et prior provincialis provincie Vallis Spoleti, licet immeritus, Ordinis fratrum heremitarum S.ti Augustini. Venerabilibus nobis in Christo dilectis Priori, ceterisque fratribus nostri Conventus de Eugubio, eiusdem Ordinis et provincie, salutem in eo qui est omnium vera salus. Mulier Antonia, uxor Pauli de la Serra, misit ad nos specialem numptium, ex eo quod ab aliquibus fratribus nostri Conventus de Eugubio fuerit impedita ne haberet soccitam suam, de qua, vel de quibus, habet publica instrumenta, que nos propriis oculis vidimus et legimus, scilicet, sibi minando soccitario, quod si dividet soccitam cum ea, quod iterum habebit dividere cum nostro conventu. Et propter hoc soccitarius, timens bis dividere, retinet debitum dicte Antonie, pro eo quod olim frater noster Mathia, eius cognatus, emit et consignavit dictam soccitam soccitario de denariis dicte Antonie. In signum huius, fecit quod instrumenta dicerent dicte Antonie; quod, si aliter esset, fecisset sibi conscientiam in morte, cum habuerit tempus, sicut fecit de aliis rebus. Nec obstat quod, licet soccitarius habuerit soccitam per manus fratris nostri Mathie, quim sint dicte Antonie, ut instrumenta canunt. Et qui per alium facit, per alium facere videtur. Nos, vero, qui in presenti hac vita, ratione officii, vicem justissimi omnipotentis Dei gerimus et iustitiam omnipotentis Dei unicuique ministrare debemus, tenore igitur presentium, tibi, priori nostri Conventus de Eugubio, et ceteris fratribus in dicto Conventu existentibus precipimus in meritum sancte obedientie et sub pena rebellionis, necnon et sub excommunicationis sententia, trina canonica monitione premissa in hiis scriptis habita, ut de cetero nullam molestiam inferre debeatis de dicta soccita, seu soccitis, dicte Antonie vel eius soccitario, de quibus ipsa habet publica instrumenta; quod, si contra nostrum preceptum feceritis et quicunque vestrum fecerit, ex nunc prout ex tunc et ex tunc prout ex nunc, excommunicationis vinculo declaramus fore innudatum vel innudatos (sic). Precipientes insuper Priori et procuratori sub eadem pena et censura, ut quatuor ducatos, quos dictus frater noster Mathias dimisit in suo inventario dari deberi fratri suo Paulo de la Serra, vel eius uxori Antonie, ut inventarium loquitur, vel qui viderunt et legerunt testificantur, debeant solvere vel dictos concordare in termino quindecim dierum a notificatione presentium, de bonis conventus. Et si de huiusmodi nostris preceptis senseritis vos gravatos, compareatis coram nobis in termino quindecim dierum a notificatione presentium, obstendentes (sic) oppositum cum scripturis et testibus veridicis. Aliter, non obedientes mandatis nostris, damus licentiam et auctoritatem dicte Antonie, vel eius excommunicatos et a sacramentis ecclesie privatos cum cedulis super portas ecclesiarum positis terre Eugubii per manus Notarii, in quibus tota hec nostra precepta de verbo ad verbum scribantur. Et hec omnia dicta sint in nomine Patris et Filii et Spiritus Sancti. Amen.

Datum in Conventu nostro de Interanne, anno Domini M CCCC LXXXX, die vero undecima Decembris, tempore provincialatus nostri officii, munitum provincie sigillo. Frater Felix de Interanne provincialis.

In nomine Domini. Amen. Anno Domini a nativitate eiusdem Millesimo CCCC LXXX, Indictione XIII, tempore SS.mi in Christo patris et domini domini Sixti, divina providentia Pape quarti, die vero XXII mensis Decembris. Actum in Conventu fratrum S.ti Augustini Eugubini, videlicet, in Capitulo dicti Conventus, cui undique sunt res et bona dicti Conventus, presentibus dompno Jacopo Berardi Casparis, Monacho Monasterii S.te Crucis Fontis Avelane, et Matheo quondam Bernabei de Eugubio, testibus ad suprascripta et infrascripta adhibitis, vocatis et rogatis. Convocato et coadunato Capitulo et Conventu fratrum S.ti Augustini, Ordinis heremitarum, de extra et prope portam S.ti Augustini Eugubii, de licentia et mandato venerabilis religiosi fratris Gregorii Iohannis de Eugubio, prioris dicti Conventus, et dictus prior de voluntate dictorum fratrum in capitulo congregatorum. In quo Capitulo intervenerunt dictus prior fr. Gregorius, fr. Petrus Nicolai, fr. Michael Baldi, fr. Ventura Arcangeli, fr. Nicola Honofrii, fr. Bernardus Iohannis Honofrii, fr. Benedictus Baldassarris, fr. Petrus Iohannis, fr. Angelus Antonii, omnes fratres dicti conventus, qui faciunt, constituunt et representant totum et universum Capitulum dicti Conventus. Dictus prior et fratres sic cohadunati et capitulariter congregati ad sonum campanelle, more solito, scientes diebus externis, ab octo diebus citra, litteras preceptorias recepisse et comminatorias, sigillo provincie Vallis Spoletane, seu venerandi in Christo patris, sacre pagine professoris, fratris Felicis de Interanne, provincialis provincie Vallis Spoletane, sigillatas; sentientes se plurimum gravatos tenore dictarum litterarum; non valentes habere presentiam prefati provincialis, exhibuerunt, produxerunt et interposuerunt coram viris egregiis, honestis et fidedignis Berardino quondam d.ni Polidori et Ceccholo quondam Baldi, personaliter in dicto Capitulo existentibus et constitutis, supradictam appellationem, cum omnibus et singulis in ea contentis, dicentes et protestantes, prout in dicta appellatione continetur. Rogantes me, notarium infrascriptum, ut de predictis publicum conficerem instrumentum. Et Ego Caspar Batiste Casparis de Santichis de Eugubio et quarterio S.ti Martini, publicus imperiali auctoritate notarius et Judex ordinarius, predictis omnibus et singulis, dum sic agerentur et fierent, interfui ac presens fui, eaque rogatus scribere, scripsi et publicavi, signoque meo consueto signavi etc.