Documenta contenta aut compendiata in Codice Eugubino, ad Ordinem nostrum non spectantia

 

An. 1315, april. 4. - D.na Agnese q. Dni. Angeli de Eugubio etc. etc. [...]

An. 1324, iul. 14. - Oddolus D.ni Angeli etc.[...]

An. 1324, decemb. 4. - Massarellus Guidoli de Eugubio etc.[...]

An. 1332, septemb. 6. - D.nus Boçonus etc.[...]. Actum in capitulo loci S.ti Augustini.

An. 1332, septemb. 27. - Contractum venditionis ... in quo ... D.nus Boçonus ... vendidit ... unam domum ... in quarterio S.ti Petri, cuius a duobus [lateribus] via et ab alio res conventus fratrum S. Augustini de Eugubio etc.

An. 1335, decemb. 1. - Nobilis et potens milex (sic) D.nus Ranutius D.ni Brunamortis de laserra de Eugubio ... vendidit duas domos etc. Actum de prope Eugubium, in vinea fratrum loci S. Augustini de Ordine heremitarum, presentibus inter alios, fratre Righo Suppolini, fratre Augustino Bartolini, fratre Iohanne Marphe et pluribus aliis fratribus dicti Ordinis.

An. 1335, decemb. 1. - D.nus Coradus D.ni Petri de la Brancha de Eugubio, nobilis et potens miles ...vendidit ... unam domum ... Actum ut supra, in instrumento praecedenti.

An. 1335, decemb. 1. - D.nus Ventura Accomandoli etc. [...]

An. 1336, tempore D.ni Benedicti Pape XII, septemb. 19. - R.dus vir D.nus Matheus, Prior Canonice S.ti Mariani, ... et D.nus Lucas Bernacoli et Canonici, ... concesserunt ... in emphiteosim etc. [...]

An. 1377, august. 24. - Actum prope Eugubium, in loco fratrum S.ti Augustini, videlicet, in dormitorio dicti loci, in cella fratris Petrutii Lucholi Franchi, presentibus fratre Petrutio, fratre Iacobo Petrutii Gentilis, fratribus dicti loci, et aliis testibus. Forte Tei Rigarelli ... et D.na Benasaie, ... uxor ipsius Francisci ... dederunt et concesserunt ... unum petium terre etc. [...]

 

 

Notitiae ex Registris Reverendorum PP. Generalium Ordinis collectae

 

An. 1358, mai 1. - Perusii.

Inter ordinationes seu constitutiones hac die datas per R.mum P. Gregorium Ariminensem Provinciae Vallis Spoleti sequens invenitur: "Ut nullus frater Ordinis, cuiuscumque status vel conditionis existat, ad monasteria sanctimonialium, infra dictam provinciam constituta, presumat accedere, causa, colore, titulo vel licentia cuiuscumque quesitis in hac parte minime valituris, preter quam cum aliquam monialem contingeret monasterium intrare de novo, vel debitum solvere conditionis humane, vel si dictos fratres contingeret invitari ad aliquod funus. In monasterio sepellendum eodem, aut in sollempnitatibus principalibus monasteriorum ipsorum; quibus casibus fratres per Priorem electi ad ipsa monasteria possint accedere, dum tamen alicui ex monialibus non loquatur etc. Sed, ut circa missas celebrandas et penitentie sacramentum monialibus succurratur eisdem per fratres ipsos, servata nostri Ordinis honestate, volumus atque ordinamus, ut in conventibus Perusino, fratres IIIIor; Aquilano, Reatino, de Civitate ducali, de Fulgineo, de Montefalcone, de Amelia, de Interanne, S.ti Augustini de Tuderto, de Castello, de Eugubio et Narniensi, in quolibet istorum, duo fratres dicti Ordinis, sacerdotes, providi et honesti atque bone conversationis et fame, eligantur per Priorem et Conventum eorum. In aliis vero locis et conventibus dicte provincie, unus tantum assumatur ydoneus, ut prefertur". (Reg. Dd. 1, pag. 349)

An. 1358, mai 27. - In Sancto Elpidio 

Concessimus Priori et Conventui Eugubino licentiam vendendi infrascriptam. Quasdam domos, ubi actenus (sic) dicebatur Monasterium S.te Cecilie, cum suis pertinentiis, extra nostrum Ordinem vendere libere valeatis vobis, tenore presentium, licentiam impartimus. Ita dumtaxat quod pretia ipsarum in loci vestri edificia, aut in campanam fiendam, ut innuitis, sine ulla distractione, penitus convertantur. Alioquin contrafacientes etc. Insuper, placet nobis quod fratribus Iohanni de Fauce, Johanni Gratioli (?), Leonardo, Pacifico, Simoni Marfe, Guillelmo ac Georgio de Eugubio, qui, ut asseritis, possessiones, quas ex ordinatione ac permissione conventus tenebant, ipsi conventui libere reassignarunt, certam aliquam provisionem annualem, in vita ipsorum, congruam tamen et rationabilem, habito respectu etiam ad possessiones vel usufructus, quas vel quos tribuerunt, toto tempore vite ipsorum, inrevocabiliter eisdem tribuendam, ordinare ac statuere, nostra frati auctoritate, non obstantibus ullis constitutionibus, additionibus seu usufructibus conventui resignatis, aut aliis quibuscumque. Alioquin totum quicquid in predictis facere et ordinare vos contingeret, sit irritum et inane. (Id. P. Generalis. - Ibid., pag. 24)

An. 1386, nov. 24. - Perusii.

Mandavimus Priori conventus Eugubii, fratri Stephano de Eugubio, sub pena solutionis de proprio, quatenus fratrem Martinum de Eugubio cogat ad assignandum sibi unum Epistolarium conventus Perusii, quod inde asportavit, et illud depositet in conventu, quousque sibi aliud significaverimus. Et si dictum Epistolarium vendidisset vel alienasset, tunc, sub eadem pena, sibi mandavimus, ut ipsum cogat ad solvendum quatuor florenos, quos simili modo depositet in dicto conventu, usque quo sibi aliud scripserimus. Item. sibi mandavimus, sub pena nostre rebellionis, a fratre Martino inquirere debeat quando et qualiter et ubi ac de cuius licentia se transmutaverit de layco in clericum, et, si expedierit, ipsum detinendo, et, si licentiam debitam habuerit, illam nobis, quam citius poterit, in scriptis transmictat; si autem non haberet, tunc, sub prefata pena, sibi mandavimus, ut ipsum debeat carceri mancipare et ipsum in carceribus detinere quousque sibi aliud mandaverimus; et quicquid fecerit nobis significare debet. (Reg. R.mi P. Bartholomaei de Venetiis, Dd. 2. fol. 120v)

An. 1389, mart. 22. - Perusii 

Concessimus licentiam fratribus de Eugubio vendendi infrascripta immobilia, videlicet: unam parvam vineam cum uno casalino et unam petiam terre positam in villa Loreti, valoris octo florenorum, et unum casalinum positum in burgo S.ti Augustini, valoris quatuor florenorum, dummodo pretium ex hiis habendum in factura campane exponatur; cum clausulis consuetis etc. (Reg. eiusd. Rmi. P., Dd. 3, fol. 93v)

An. 1389, mai. 2. - Tolentini 

Concessimus licentiam fratribus de Eugubio vendendi unam domunculam cum modico orti, que olim fuit nostre oblate nuperrime defuncte, valoris quinque florenorum, prout a nobis (vobis) informati fuimus per litteras, conventus antedicti sigillo munitas; dummodo pretium inde habendum pro solutione campane dicti conventus integraliter exponatur; cum clausulis consuetis etc. (Ibid., fol. 97v)

An. 1390, dec. 1. - Eugubii

Precepimus cuilibet fratri Conventus de Eugubio habenti aliquod bonum immobile, aut etiam animalia apud rusticos vel quoscumque, sub pena privationis predictorum, aut omnium aliorum sibi ab Ordine concessorum, stricte posuimus in mandatis, ut, a notitia presentium infra duos menses debeat totaliter ordinasse quod omnia iura dictorum bonorum, aut tam clara notitia per instrumentum et cedulas in conventus deposito habeantur, vel apud alium secularem, qui possessionum conventus instrumenta retinet et scripturas, quod nullo casu dicta bona aut modo alio perdere conventus possit, quin post (?) cuiuscumque vestrum taliter aliquod ipsorum bonorum possidentium obitum, ad ipsum vestrum locum integraliter convertantur, nisi et prout de aliis bonis ad idem immediate pertinentibus monasterium posset contingere quoquo modo. Et, si aliquis predictorum fratrum huic nostro mandato contempserit obedire, quemlibet talem prefatas penas se noverit incurrisse ipso facto, ac ex nunc pro tunc, excommunicationis vinculo innodamus, quam trina amonitione canonica premissa, licet inviti, posuimus in hiis scriptis. Lata et lecta est hec nostra sententia in nostro conventu de Eugubio. (Ibid., fol. 140v)

An. 1391, mart. 18 - Arimini

Condonavimus fratribus Thomasutio, lectori, et Philippo, eius germano, de Eugubio, quatenus in bonis immobilibus, uno ex ipsis decedente, alter succedat, quousque vixerit in humanis, sive talia bona patrimonialia forent, aut aliunde per aliquem ipsorum fuerint conquisita. (Ibid., fol. 146)

An. 1391, mart. 19 - Arimini

Mandavimus Priori, Lectori, ceterisque fratribus conventus de Eugubio, ut, a notitia presentium infra mensem, quilibet ipsorum habens aliqua bona immobilia, undequaque sibi pertinentia, ad usum cuiuscumque dictorum in particulari pertinentia, debeat omnia iura dictorum bonorum posuisse in sacristia predicti conventus, sub pena privationis eorundem bonorum, quam ipso facto quemlibet contempnentem huic nostre ordinationi atque mandato obedire mandavimus incurrere. Si vero prefatorum bonorum iura in aliquem secularem dicerent, non in fratrem, tunc voluimus, ut sufficiens scriptura recognitiva dictorum bonorum, ut qualiter ad prefatum fratrem pertineant, debeat infra suprascriptum terminum, sub eadem pena, per huiusmodi secularem assignari conventui, in sacristia similiter deponenda, fratre ipso ad quem pertinent bona huiusmodi procurante. (Ibid., fol. 146)

An. 1425, dec. 13 - Rome

Mandavimus Priori et fratribus Conventus nostri de Eugubio, provincie Vallis Spoleti, ne molestent alio modo fratrem Augustinum de Eugubio, eo quod ad Conventum de Conductu transivit, ut sub regulari observantia in ipso viveret. Cum conventus ipse licentiam a nobis habeat recipiendi fratres illic vivere religiose volentes, etiam cum bonis suis certam summam non excedentibus, quam bona illius neque attingere videntur, cum se nil pene habere dicat, nisi partem fructuum possessionis cuiusdam, quam cum fratre suo indivisam habet. (Reg. R.mi Aug. de Roma, Dd. 4, fol. 182)

An. 1426, iun. 17 - Fulginei -

Confirmavimus egregios viros Franciscum Masci et Ser Nicolaum Tomassi de Eugubio in Sindicos et Santenses Conventus nostri de Eugubio iuxta electionem factam a fratribus, Magnifico Domino Comite Urbini etc. et omnibus conventus ipsius devotis id fieri cupientibus. Dantes ei(s) auctoritatem, ut simul cum fratribus, omnia bona loci, mobilia et immobilia annotari facere possint, amministrationem horum cognoscere, videre rationes, unam clavem depositi, in quo serventur res que digne maiori custodia videantur tenere, cavere ne quid absque cogenti necessitate aut utilitate vendatur, et alia agere simul cum illis, que ad optimam loci et bonorum eius gubernationem pertineant. Quicquid pro fabrica ecelesie aut loci datum sit, aut pro aliis quibuscumque rebus, id ut in illas solas exponatur agant. Nichil tamen notabile ut pothe (sic) hedificium, fabricam, venditionem et similia, alteri sine alteris facere possint, sed cum consilio cuncta fiant. Neque horum officium nisi per triennium duret; quo completo, novorum santensium nova electio fiat a veteribus et fratribus simul, qui, cum electi fuerint, omnem parem auctoritatem continuo consequantur. Volumus tamen hii duo cum fratribus nunc quoque tercium eligant, ita ut sint tres, veluti et alibi esse solent. Declaravimus fratribus Conventus Eugubini preceptum quod fecimus fratri Amato de Eugubio, ne illuc redeat, sub pena carceris per sex menses. Mandantes hiisdem, sub pena nostre rebellionis, ne ipsum, si sine nostra licentia in scriptis accedat, admittant, sed carceri mancipiant, ut nostri precepti contemptor debita pena puniatur, ad aliorum exemplum. (Ibid., fol. 198)

An. 1427, febr. 4. - Bononie

Dedimus licentiam fratri Amato de Eugubio, ut si Magnifico Domino Comiti Urbini etc. placeat, cuius quoque licentiam prius eum habere volumus, possit ire Eugubium et, donec sanitatem recuperaverit, commorari. Qua sibi restituta, volumus discedat et quo provincialis mandaverit, moratum eat. Nostras vero litteras, quibus ne illuc iret inhibueramus, interim nil ei nocere volumus, sed postea suum robur recipere. (Ibid., fol. 211v)

An. 1428, ian. 20 - Bononie

Inhibuimus fratribus Conventus de Eugubio, ne aut sine Operariis aut cum ipsis, quicquam ex bonis immobilibus vendere possint sine nostra licentia speciali. (Ibid., fol. 225)

An. 1431, oct. 30. - In Bononia

Concessimus fratri Iohanni de Eugubio quod posset ire, quotiens sibi videretur, ad celebrandum ad quoddam castrum, quod dicitur Carestello. Concessimus fratri Honofrio de Eugubio, quod posset fratres illic venientes retinere usque ad numerum sibi necessarium, dummodo non sint rebelles provintialibus et prioribus. Item, quod possit ubicumque fuerit vocatus in Ordine ire ad predicandum, dummodo conventus Eugubii non steterit sine predicatore. Concessimus fratribus de Eugubio quod, pro reparatione dormitorii, possent vendere quandam vineam quondam fratris Helymosine. (Reg. R.mi Ger. Ariminensis, Dd. 5, fol. 316v)

An. 1431, dec. 10. - In Bononia

Ad petitionem D.ni Comitis Urbini, concessimus fratri Ambrosio de Eugubio quod possit cum dicto Domino morari et ad cuncta servitia illius sibi grata deputari in omni loco et tempore. Nec ab inferiore etc. (Ibid., fol. 317)

An. 1432, dec. 3 - In Florentia

Concessimus fratri Ambrosio de Eugubio, lectori, quod possit ire, quotiene opus fuerit, cum uno sotio, ad domum habitationis matris sue, et etiam, necessite urgente, solus, sine alicuius alterius licentia postulata. Item, quod possit unum puerum nutrire in Ordine et ad sua honesta et grata servitia deputare, sine alicuius nostri inferioris contradictione. Concessimus fratri Johanni de Eugubio quod possit quater in mense ire ad celebrandum quocumque voluerit, sine alicuius nostri inferioris contradictione, et quod elemosinam, quam inde reccipiet (sic) in suos usus possit convertere, etc. Concessimus fratri Yeronimo de Eugubio quod possit artem lignorum frabilium (sic) exercere in omni loco et civitate et ibi demorari, tam in conventu quam extra conventum, secundum quod illius artis exercitatio postulaverit, etc. (Ibid., fol. 317v)

An. 1433, ian. 1. - Misimus litteram Conventui Eugubii, in qua precepimus quod de pecunia cuiusdam possessionis vendite pro reparatione conventus, prior vel procurator aut quicumque alius qui exposuit, reddat rationem coram conventu, et si quid residuum fuerit exponatur, vel in reparatione conventus, si indiguerit, vel possessionum conventus similiter reparatione, sub pena privationis offitii prioris et conventualitatis ceteris fratribus, et solutionis de proprio omnibus qui aliter exposuerint etc. Item, quod non possit vendi aliqua possessio, etiam necessitate urgente, sine licentia nostra vel Provintialis; et ultra hoc, sine consensu omnium patrum conventus in conventu existentium et extra conventum in provintia, sub eadem pena. Item, quod cera que venit ad sacristiam ponatur in una capsa, que habeat duas claves, quarum una teneat prior et alia unus ex patribus conventus, qui non sit sacrista, sub pena furti priori et sacriste si aliter etc. (Ibid., fol. 318)

An. 1461, mai. 3 - In Monte policiano

Precepimus Priori Eugubii et Procuratori, sub pena privationis officii et solutionis de sibi ad usum concessis, ut infra X dies a notitia presentium debeant solvisse fratri Iuliano de Fulgineo quod debet recipere a conventu. (Reg. R.mi P. Guill. de Bechis de Florentia, Dd. 6, f. 277v)

An. 1468, aug. 5 - Perusie

Concessimus Magistro Masarello de Eugubio, ut, si provintia in proximo capitulo, vel congregatione, de consueto subsidio magisterii non satisfacere curaverit, quod ipse collectam sui conventus (Eugubii) accipiat et retineat tanto tempore quanto sibi satisfactum, veluti multis aliis patribus ipsius provintie aliter factum extitit. (Ibid., fol. 280)

An 1480, apr. 11 - Rome

Misimus litteras ad Conventum nostrum Eugubii in quibus precepimus fratribus, sub pena excommunionis late sententie, quod non possint alienare bona immobilia olim bone memorie Magistri Massarelli, et quod sint ad obedientiam Prioris et ipse Prior possit omnes delinquentes corripere et possit invocare brachium seculare, et quod nullus cuiusvis conditionis possit aliquid attemptare sive disponere sine scitu et voluntate Prioris. (Reg. R.mi P. Ambrosii de Cora, Dd. 7, fol. 280)

An. 1482, iun. 1 - Perusie

Concessimus licentiam fratri Gregorio Eugubiensi quod possit commorari in monte Collis Georgi, in oratorio suo, S.ta Maria in partu nuncupato, cum gratiis quas prius habebat in conventu suo, et quod retinere possit cameram suam in Conventu Eugubii. (Reg. R.mi P. Ambrosii de Cora, Dd. 8, fol. 274 ant.)

An. 1490, oct. 15 - Perusii

Concessimus fratri Herculano de Perusio, ad instantiam sui avunculi, quod possit morari in conventu nostro Eugubii ad dandam operam litteris gramatice. (Reg. R.mi P. Anselmi de Montefalcone, Dd. 8, fol. 281 ant.)