Nonnullorum documentorum Conventus Eugubini, in charta, quae asservantur in Archivio Communis Eugubii fondo Armanni, Notitiae

Archivio comunale

 

 

Busta IV, D. 4, nunc n. 35. - Ad dorsum scriptum habet: "VI. I. - Vertenze civili - Compre e donazioni - Testamenti aspettanti al Conv. di S. Agostino dal (1)340 al (1)520" - Non tantum testamenta, sed documenta omnia contenta in hoc volumine, spectant ad Conventum S. Augustini. Ex eis, praeter documenta superius transcripta n. LXXXVIII, LXXXVIIII, LXXXX, CII, CIII, CIV et CV, notatu digna existimo quae sequuntur:

 

1. Fasciculus seu quaternus folior. 6. - In primo folio legitur: "Hic liber fratrum loci et conventus S. Augustini de prope Eugubium in se continet petitionem, dicta testium receptorum super ipsa, ad perpetuam rei memoniam confessiones Pauli Luppolini, tutoris Monaldutii et Iohannis, filiorum quond. et heredum Vilani D.ni Maffei de Eugubio, Anno 1347. - Signat. N. 1, L .A.

 

2. Copia testamenti D.ni Petri Francisci, Comitis de Pretorio, facti an. 1363, mart. 14, superius transcripti sub n. L, et bonorum ab eo relictorum Inventarii.

 

3. Fasciculus folior. 17, continens "Processum fratrum S.ti Augustini de Eugubio super loco, sive expoliatione loci S.ti Augustini de Fracta (nunc Umbertide), an. 1374.

 

4. Protestatio Fratris Pauli, prioris ecclesiae et loci S. Augustini de Eugubio, contra edictum publicatum a ... Ceccho, Vicario Episcopi Eugubini in Castro Fratte filiorum Uberti, dioec. Eugubinae, in quo praeceptum erat "quod nulla persona, nullus clericus, cuiuscumque status et conditionis existeret, sepelire deberet in aliqua ecclesia nec eius cimiterio Petrum Iohangnoli de dicto castro, oblatum Ord. S. Augustini, eo quod, ut dicebatur, predictus Petrus fuerat usurarius". - Sine data nec ulla temporis indicatione. Forsan Fr. Paulus protestator unus est ac idem cum fratre Paulutio, qui anno 1416 erat prior Conventus Eugubini S. Augustini. Vide documentum n. LXXXIX.

 

5. Fasciculus signatus: N. 4, 1. A - "Acta causae fratrum S.ti Augustini de Eugubio, Ordinis heremitarum, cum Communi Eugubino super una vinea". Fol. 2: Comparitio Syndici Communis contra fratres. An. 1421. - Copia mandati procurationis facti a conventu Fratri Gregorio Manni de Eugubio.

 

6. Lis circa possessionem ecclesiae S.tae Mariae Novae de Eugubio, concessae Priori et Fratribus S. Augustini eiusdem civitatis a D.no Antonio Garini de Mediolano, Monasterii S.tae Mariae de Alfiolo, Ordinis S. Benedicti, Abbate, anno 1438. - Folium primum, quod initium continebat cuiusdam brevis Eugenii Papae IV, dat. Florentiae an. incarnationis Dominicae M CCCC XXXVIII, quintodecimo kal. Aprilis, pontificatus eius anno nono, in quo approbata et confirmata fuit unio praedictae ecclesiae Conventui Eugubino S. Augustini, desideratur. In Archivo generali Ordinis est copia simplex, manuscripta, in charta, alterius brevis eiusdem Pontificis, dati Florentiae anno 1439, 19 kal. februarii, quod incipit: "Dudum siquidem", in quo committitur Ven. Archiepiscopo Neapolitano negotium unionis, de qua in praecedenti brevi agitur. Habere in mentem oportet et non oblivisci quod annus Eugenii IV nonus ad diem 15 martii anno nativitatis dominicae 1439 respondet.

 

7. Renovatio professionis religiosae facta a fratre Ludovico Nicholai Melchioris de Eugubio, fratre Ord. Eremit. S. Augustini an. 1463. - Not. Franciscus quond. Thomasutii Nicolecti de Eugubio. - Orig. 2 fol.

 

8. Instrumentum donationis omnium suorum bonorum factae Conventui S. Augustini de Eugubio a fratre Ubaldo Puccetto, O. S. Augustini, an. 1540, iun. 30. - Copia autenticata.

 

9. Mandatum procurationis factum per Fratres Conventus Eugubini fratri Thaddaeo de Eugubio, an. 1558. - Copia.

 

Busta 36 - Sicut busta praecedens, a tergo habet scriptum: "V. e II - Compre, donazioni, testamenti dal 1500 al 1700". - Omnia documenta, quae in ea inveniuntur, spectant etiam ad Conventum S. Augustini Eugubinum.