PATAVINUS BELLINUS

 

 

 

Patavinus Fr. Bellinus, theologus pius et doctus, floruit saec. XV. Anno 1464 iam erat religiosus ac philosophiae studens; eo enim tempore scripsit sequens opus: Quaestiones Ioannis de Ianduno in libros de Anima miniatae fol. magno ch. scriptae per fratrem Bellinum de Padua 1464. An. 1465 Lector renuntiatus ac in patrio coenobio inter Lectores constitutus quarto loco (Analecta August., Vol. VII, p. 116); inde, die 4 iunii 1470, Baccalaureus declaratus constituitur in conventu Ferrariensi (Ibidem p. 188). Sub die 22 octobris 1471 in Registris Generalis Guillelmi Becchii fol. 165, haec de illo leguntur: "Dedimus licentiam fr. Bellino de Padua Bachalario, ut post festum Epiphaniae statim possit intrare examen et insignia magistralia recipere et omnia facere inclusive". An. 1475 erat Patavii Prior; et an. 1489 mense maii electus est Prior Provincialis suae provinciae. Uti Definitor eiusdem interfuit Capitulo Generali an. 1497 Romae celebrato, in quo Prior Generalis unanimiter electus evasit Marianus de Genestano. Insignis Heremitarum Patavina Bibliotheca plurimis egregiis manuscriptis, etiam membranaceis ornata, eiusdem Bellini industria erecta fuit. De illo Scardeonius, libro de antiquitatibus Patavinis loquens, inseruit: "Paulo Zabarellae ferme par floruit Bellinus insignis theologus, cuius non modicae laudis fuit editio et correctio Martyrologii, quod olim cum pro sua caritate in choris tantum et in conventibus publice legeretur, nunc hujus opera factum, ut ab omnibus legatur: et propterea merito eius nomen non tantum in illa prima editione et amplius voluminum inscriptum est; sed postea quoque quoties huiusmodi opus imprimitur, non nisi sub Bellini Eremitani theologi Patavini correctoris nomine publicatur. Itaque hujusmodi pia martyrum memoria cum nomine hujus immortalitate a posteris ubique celebrabitur". Eum Pamphilus, fol. 111, inter celebres scriptores Augustinianos sub an. 1533 collocavit, sed, ut refert Herrera, T. I, p. 113, ad immarcescibilem sanctorum coronam, Bellinus jam ab an. 1514 laetus properaverat, nobis relinquens:

1. Quaestiones Ioannis de Ianduno in libr. de anima scriptae per Fr. Bellinum de Padua an. 1464, miniatae fol. magno chart. Ita I. Fhil. Tomassini, Bibl. Patavinae, p. 78. Olim erant in nostra Patavina Bibl.

2. Martyrologium correctum et illustratum. Inscriptio, sen titulus primae editionis ita sonat: Martyrologium secundum morem Romanum. Et his clauditur verbis: "finit Martyrologium accuratissime emendatum per Magistrum Bellium (lege: Bellinum) de Padua Ordinis Fratrum Heremitarum S. Augustini, nec non addictionibus Patrum aliarum Religionum copiosus effectum. Impressum Venetiis iussu et impensis nobilis viri Lucae Antonii Giunta Florentini, arte autem Ioannis Emerici de Spira, 1498 idibus octobris. Fuit iterum reimpressum Venetiis 1509, 1517, 1522 apud Giuntas in 4, et an. 1564; item Parisiis an. 1521 et 1536 pariter in 4. Insuper a Bellino extat:

3. Opus de laudibus Martyrum, Venetiis praelo datum. Eius emendatio Martyrologii Romani ms. asservatur in Biblioth. Chisiana, nunc in Vaticana, Cod. 816 B membr. in 4. Exemplar editionis an. 1488 est in Bibl. Angelica Romae sub signo H. 10. 25. 

 

 

 

Referenze:

Iöcher, T. I, col. 939; Torelli, T. VIII, p. 5, n. 8; Gandolfo, p. 95; et Ossinger, p. 119; Herrera, T. I, p. 113; Portenari, Della Felicità dì Padova, p. 455, et alii