PATAVINUS GREGORIUS

 

 

 

Patavinus Fr. Gregorius S. Theol. Mag., an. 1539 interfuit capitulo gen. Neapoli habito ut Discretus suae Tarvisinae Provinciae; an. 1543 cap. gen. Romano, ut Definitor Provinciae Sardiniae; an. 1547 cap. gen. Recinetensi ut Definitor Prov. Terrae Sanctae, in quo quidem capitulo electus fuit et revisor litterarum et Provincialis suae Tarvisinae Provinciae. An. 1545 Episcopi Catanensis Socius cum Generali Seripando ad Synodum Tridentinam iter egit. An. 1548 munus Vicesacristae ei oblatum respuit, nisi cum iura daretur futurae successionis. Bononiae in comitiis generalibus an. 1551 totius Ordinis Generalis Procurator electus, et a Generali Christophoro Patavino ad Concilium Tridentinum ituro, in provinciis Italiae et Siciliae et in generalibus conventibus, excepto Romano, Vicarius Generalis eodem anno die 12 augusti constitutus. Fuit, Scardeonio in Historia Patavina, celeberrimus concionator, et Portenario in felicitate Urbis Paduae, publicus in Sapientia Romana Theologiae Professor, et Pamphilo in Chronica August., clarus in Concilio Tridentino tempore Pauli III, et quorumdam orationum editor. Anno 1553 aemulorum fortassis invidia ad Inquisitionis tribunal de haeresi accusatus, sed a Patribus Purpuratis illius Congregationis innocens declaratus. Nihilominus, cum in munere Procuratoris Generalis vix quadriennio permansisset et in capitulo Gen. Ariminensi an. 1555 in eius loco alius suffectus esset, Pius Pp. IV illum aliquo honore donare voluisse eruitur ex eius Breve diei 1 augusti eiusdem anni edito in Analectis August., Vol. X, p. 17, sed die 27 eiusdem mensis et anni, Romae decessit et in templo S. Augustini sepultus fuit. Ex eius operositate recensentur:

1. Orationes tum Romae coram SS.mo et Cardinalium Senatu tum in Concilio Tridentino et alibi habitae.

2. Magistri Gregorii Patavini Ord. Erem. S. Augustini Sententia de Justitia Christi et nostra, item de certitudine gratiae praesentis, et Opusculum, quod inc.: "Cum in primo" quod asservatur ms. in Bibl. Vat. Lat. Cod. 6147 inter ff. 156-162.

 

 

 

Referenze:

Herrera, T. I, p. 311-12; Elssius, p. 249; Torelli, T. VIII, 291; Ossinger, p. 672; et Lanteri, Eremi Sacrae Aug., Parte II, p. 231