de ROMA PETRUS

 

 

 

de Roma Fr. Petrus, vixit saec. XIII labente. Et revera: an. 1281 in capitulo provinciali loci S. Martini de Campiano mense octobris celebrato defìnitum fuit "quod Fr. Petrus de Roma vadat parisios pro studente Romane provinciae quinque annorum, et succedat in previsione expensarum et librorum fratri Bernardino et fratri Iacobo de Roma, lectoribus". Absolutis studiis quinque annorum a Provincia revocatur, et in capitulo an. 1287, e studio Parisiensi iam reversus, et lector nominatus, eligitur Definitor Provincialis. An. 1289, B. Clemente ab Auximo Generali et Capitulo provinciali de Tegulario praeside, eum, fratres electores, dum Neapoli esset in studio generali lector ac ideo absens, unanimiter et concorditer in Provincialem suae Romanae Provinciae elegerunt. Sustinuit postea, anno scilicet 1295 in Capitulo generali Senensi disputationes de quolibet contra doctorem nostrum Aegidium Romanum, Priorem Generalem absolutum et anchiepiscopum Bituricensem noviter electum. Certe illum Petrus iam Parisiis audierat. Lector primus in Curia, eodem anno, capitulo provinciali de Monteflascone interfuit et anno insequenti Viterbii iterum Provincialis eligitur.

Uti Provinciae Discretus anno 1298 interfuit et capitulo generali Mediolanensi in quo B. Augustinus de Tarano Prior Generalis evasit. An. 1300 in generali capitulo de Neapoli Petrus Florentiae pro primo lectore locatus fuit. In antiquioribus Provinciae nostrae Romae actis in Analectis Augustinianis, Vol. II et III editis, a quibus haec ausimus, non amplius de eo fit mentio. Quod scripsit eruitur ex quadam definitione capituli generalis de Senis 1295, qua statutum fuit: "quod Ystoria quam edidit frater Petrus Romanus de Beato Paulo primo Heremita in cantu per totum nostrum ordinem promulgetur, et ea fratres nostri ordinis utantur ubique ad honorem et reverentiam dicti Sancti."