SABBATINI IOSEPH

 

 

 

Sabbatini Fr. Ioseph, Ravennas S. Theol., Mag., dicitur ab Ossinger, p. 783: "vir doctissimus et eruditissimus, atque artes fere omnes, quas liberales vocant, optime calluit". Cum in Italia tum Viennae Regentis studiorum munere maxima cum laude functus fuit. Ab an. 1665 ad an. 1667 praefuit suae Romandiolae Provinciae, quo in munere interfuit capitulo gen. hoc postremo an. celebrato. Praefuit postea et conventui Bononiensi, et anno 1677 Angelicae Bibliothecae Urbis. Ut provinciae suae Definitor interfuit etiam capitulo gen. an. 1679 Romae habito, in quo propositus fuit in munere Assistentis Generalis Italiae; "verum, ita legitur in Actis (Cfr. Analecta August. Vol. XI, p. 385), ubi primum se nominatum audivit propositum, R. P. M. Iosephus Sabbatini Ravennas, omni cum modestia et humanitate genua flectens vocales preces coram toto Definitorio porrexit E.mo D. Protectori et Praesidenti Apostolico, eum iterum atque iterum vocans ut non proponeretur nullo omnino ambitionis stimulo impulsus ad hujusmodi munus Assistentis Italiae consequendum, sed potius (ut omnibus innotuit) religiosae cohibitus exemplari freno". Pro illa vice eius preces acceptatae fuerunt, sed non ita evenit in capitulo gen. an. 1685 in quo ad id munus iterum fuit propositus, electus et confirmatus. Hoc in munere una cum nostrate Michäele Echio Assistente Gen. Germaniae aliisque perdoctis viris Constitutiones Ordinis correxit, et temporum adiunctis accomodavit. Obiit valde senex an. 1700, corrigendus itaque est Ossinger qui scribit illum supremum diem obiisse die 7 aprilis 1625, quando nempe ille forsan natus est. Ex eius ingenio habentur:

1. Monacatus Divi Aurelii Augustini et originis Familiae Eremitarum Vindiciae. Viennae Austriae, typ. Matthaei Rictic, 1650 in 4.

2. Requesenius ad examen, seu Contritio et Attritio pro Lupo, libellus apologeticus. Aquilae, typ. Petri Pauli Castrati, in 8, sub nomine Ananiae Cainet.

3. Vita Christiani Lupi. Lovanii, apud Hieronymum Hempraeum, 1682, ante Epist. Patrum Ephes. et Chalced. cum scoliis Christiani Lupi. Item separatim s. l. et n. ed. in fol., nec non Venetiis apud Albritium, 1724 in primo tomo operum Christiani Lupi. Reperitur etiam ms. in cod. 891 Bibl. Angelicae Urbis.

4. Censura in partem operis, cui tit.: "Summa M. Antonii de Dominicis" historice confutata.

5. Epistola ad Iacobum Fiorellum, circa falsum rumorem Venetiis sparsum, quod Christianus Lupus apud S. O. haereseos a Iesuitis sit postulatus; d. Romae, 1 nov. 1679.

6. Censura super opinionem Thirsi Gonzalez, S. I, quod nempe post iustificationem remaneat aliqua malitia levis, in qua fundetur reatus poenae Purgatorii.

7. Iudicium super accusatione, quod Vincentius Baronius, Ord. Praed. in libro Ethices christianae, violaverit Constitutionem Alexandri VII, quae incipit: "Sollecitudo".

8. Censura super propositionibus a P. Porterio delatis. Haec postremae opellae nostratis Sabbatini nempe a n. 5 ad 8.um asservantur mss. in cod. 899 Biblioth. Angelicae Urbis, ff. 83-91, 113-122, 249-259.

 

 

Sabatini Fr. Ioseph, (ADDITAMENTA, pag. 78) Codex Angelicus N. 899, n. 5, 14, 21, 41.

 

 

 

Referenze:

inter alios Ginanni, Memorie storico-critiche degli Scritt. Ravenn., Vol. II, p. 342; Lopez, Addit. ad Crusenii Monasticon, Vol. II, p. 256; Torelli, T. V, p. 133; Piazza, De Bibliothecis Romanis, et Narduccii, Catal. Mss. Lat. Bibl. Angelicae Urbis, p. 365, 382-4