SALOMONI ALEXIUS

 

 

 

Salomoni Fr. Alexius, Nepesinus, S. Theol. Mag., Provinciae Romanae alumnus, an. 1592 interfuit capitolo gen. Romano tamquam Provincialis Stiriae et Carintiae, et in eo S. Theol. Mag. fuit renuntiatus. Quamdam orationem edidit cui tit.: Oratio Fr. Alexii Nepesini Augustiniani de Laudibus Divae Catherinae Virg. et Mart. Florentiae apud Georgium Marescottum, 1588, pp. 16. Habita fuit in ipsa civitate Florentina in ecclesia S. Spiritus, atque integerrimo viro Laurentio Aveduto Fanensi praeceptori optimo dicata. Praeit auctoris epigramma ad eamdem Virg. et Mart., atque subsequitur: Musa eiusdem invehens in Maxentium. Asservatur in Angelica sub sign.: o. 3. 8.