de SENIS ADEODATUS

 

 

 

de Senis Fr. Adeodatus, divinarum rerum peritissimus, quas multis annis in publico Senensium gymnasio magno applausu professus est, an. 1548 erat praeceptor filii marchionis Terrae Novae in domo Archiepiscopi Panormitani Petri Taliavia de Aragonia, nobilissima Aragoniae gentis stirpe geniti, postea S. R. Eccl. Cardinalis et praedicti marchionis fratris; anno 1553 fuit Rector Provinciae Siciliae; anno 1555 Vicarius Generalis Provinciae Bavariae designatus, et an. 1552 interfuerat Synodo Tridentinae, sicut et an. 1563. Eius sub anno 1568 meminit Pamphilus, f. 127, eumque laudant Torelli, T. VIII, p. 447, 505; Ossinger, p. 826; Herrera, T. I, p. 62; Elssius, p. 12, et Lanteri, Postr. Saec. Sex R. A., T. II, p. 210. Posteris ab eo relicta sunt:

1. Oratio in die Cinerum habita ad patres in Concilio Tridentino, Venetiis 1552, typ. Aldi Filii, quae asservatur in Bibl. Angelica sub signo, p. 4, 47 et apud Philipp. Labbeum, Concilia T. XIV Parisiis 1672, col. 1524-1534.

2. Oratio pro reformandis, instaurandis, restituendis coenobiis Augustiniensibus Provinciae Bavariae, Viennae habita die 30 octobris ad Ferdinandum Romanorum, Ungariae, Bohemiae Regem gloriosissimum, 1555, in 4. In Bibl. publ. Senensi, Miscell. Oratorie, T. 10, n. 18.

3. Orazioni Latine (Cfr. Miscel. ms. Bibl. Senatus, 85. IV, 7), p. 10v.

4. Epistolae tres, I. ad Seraphinum Ferri eius coheremitam, qua laudat eius propositum colligendi epistolas Aegidii Viterbiensis, cui addictissimus erat, et duae ad ipsum Aegidium, quae sunt in cod. 1001 Bibl. Angelicae Urbis ff. 2, 28, dum 1.a edita fuit ab Edmundo Martene in Vet. Script., T. III, Parisiis, 1724, col. 1242. In eodem codice 1001 asservantur 27 Epistolae laudati Aegidii Viterbiensis ad eumdem Deodatum missae; aliae sunt in cod. 1170 eiusdem Bibl.; in quo reperiuntur etiam Epistolae 18 Fr. Gabrielis Veneti ad ipsum Deodatum et aliae in aliis codicibus.

 

 

 

Referenze:

Miscel. ms. Bibl. Senatus, 85. IV, 7