de SULMONA IOANNES

 

 

 

de Sulmona Fr. Ioannes, inter Augustinianos scriptis celebres a Pamphilo, et Crusenio sub anno 1341 recensetur. Eius tractatum de ieiunio Ecclesiae a Pamphilo praetermissum, et in Cantica Canticorum Commentaria, olim in conventu Ratisponensi conservari Hieronymus Roman, in Chronica Ms., et Milensius in Alphabeto testantur. Ita Herrera, T. I, p. 463. Teste Ossingero in sua Biblioth. August., p. 883, praedicta Sulmonensis opera adhuc extabant suo tempore in praedicta Ratisponensi nostra Bibliotheca una simul compacta, et utraque P. Generali Guillelmo de Cremona dicato. Ossinger testatur etiam illa osservari etiam in nostra Ferrariensi; sed eiusdem fratris Ioannis extat in B. Angelica etiam Commentarius in Apocalypsim, seu Additiones Iohannine, addito textu biblico maiori caractere, in cod. 989 (R. 6. 4), membr., in 4, saec. XIV, ff. 21, binis coll., in fine mutilus. Inc. prologus: "Venerabili in X.o patri fratri Guillelmo Priori generali fratrum heremitarum Sancti Augustini Frater Iohannes de Sulmona solo nomine lector eiusdem ordinis se ipsum et ...". Inc. Comment.: "Spiritu magno vidit ultima ...". Expl.: "ad Apoc. cap. XVII, § 8". Plura de se auctor in prologo, ubi dicit hunc laborem et addictiones" quas "Iohannine" vocare praecipit, an. 1327 incepisse.

 

 

 

Referenze:

Narducci, Cat. cit., p. 414