TORTI ALEXANDER

 

 

 

Torti Fr. Alexander, Ticinensis, S. Theol. Bacc., nostrae Congregationis Lombardiae egregius alumnus, an. 1487 erat Vicarius Prior Conventus S. Pauli Papiensis nec non sindicus et procurator ecclesiae S. P. Augustini. Ab anno autem 1493 ad an. 1495 Prior eiusdem conventus S. Pauli. Pluries item fuit definitor et Vicarius eiusdem Congregationis: brevi unus fuit ex religiosis illis, qui, honestate morum, pietate et in agendis dexteritate magis praefulserunt.

Typis edidit: Privilegia una cum supplicationibus praefatae Congregationis observantium fratrum heremitarum S. Augustini per magistrum Bernardinum de Garaldis impressa: et per venerandum P. Fratrem Alexandrum de Tortis papiensem eiusdem Congregationis: ab originalibus litteris de verbo ad verbum extracta, ac diligenter correcta et emendata Papiae die 1 Maii 1509. Est libellus in 8 antiquo, litteris a I in foliorum parte inferiori distinctus. Habet in fronte sub titulo expressam imaginem S. P. Augustini mitra et baculo insigniti. Est rarum et unum exemplar asservatur in archivo Ordinis. 

 

 

 

Referenze:

Maiocchi Casacca, Codex Diplomaticus cit., Vol. III, in praef. p. XX