VALVASORI DOMINICUS

 

 

 

Valvasori Fr. Dominicus, Mediolanensis, ex perantiqua et patritia progenie ortus, in patrio ad S. Marcum coenobio Augustinianae familiae nomen dedit adhuc adolescens, et tum virtutibus tum scientiis praesertim theologicis clarissimus evasit. Multis annis Pisauri, Bononiae et Romae Augustinienses alumnos docuit, atque extitit nedum eximius in scientiis divinis doctor, verum etiam celebris concionator. Fuit in Ordine Assistens Italiae, Procurator Generalis, et an. 1676, die 26 novembris ab Innocentio XI totius Augustinianae familiae Vicarius Apostolicus constitutus; quo in munere ita laudabiliter se gessit, ut in Comitiis Generalibus Romae habitis, die 20 maii 1679, is in Priorem generalem electus fuerit. Sexennio gubernii expleto, quo perdurante in bono promovendo magnum ostendit zelum, die 18 martii 1686 ad Episcopatum Gravinae in regione Barensi promotus fuit. Episcopus exemplaris fuit, nam multa bona praedictae dioecesi contulit, sed invida mors die 2 octobris 1689 illum de medio sustulit. Relicta sequentia ab eo fuere:

1. Conciones quadragesimales.

2. Acta Ordinis nostri una cum multis Epistolis tum latine tum italice scriptis cum Procuratoris et Prioris Generalis munera obiret: quae Romae in nostro archivo asservantur.

3. Decreta et acta pro Regimine Ordinis edita diebus 10 aprilis et 10 novembris 1679-1683. Reperiuntur impressa in cod. 230, ff. 58-64, Bibl. Angelicae Urbis, et in Analectis August. Vol. XI, pp. 366-399.

4. Constitutiones Synodales pro Clero Gravinensi editae in Dioecesana Synodo.

5. Regulae et statuta servanda in Seminario Clericorum Gravinensium.

6. Consultatio ad refellenda nonnulla asserta Patrum Excalceatorum Ordinis nostri; qua inter cetera probatur B. Ritam de Cassia ob poenitentiam tantummodo voluntariam, non autem ex praecepto regulae sive instituti aliquando excalceatam incessisse. Romae, apud Impressorem Cameralem.

7. Epistola ad Adeodatum Nuzzi, tunc Regentem Teatibus autogr. data Gravinae, in cod. 891, Bibl. Angelicae Urbis f. 59.

 

 

 

Referenze:

Argelati, T. lI, part. I, col. 1565; Ossinger p. 909 et Lanteri, Erem. Sacrae, Part. I, p. 88