de VERONA NICOLAUS

 

 

 

de Verona Fr. Nicolaus, vir in omni varietate scripturarum egregie doctus, et in componendis monasteriis et solers et diligens, qui in Priorem primo Bononiensis, deinde Veronensis monasterii, et postea in utroque in Vicarium Generalem assumptus non solum in observantia regularis disciplinae se studiosum exhibuit, sed etiam in conservandis possessionibus, ampliandisque magnam diligentiam adhibuit. Loca quoque conventibus et fabricis nobilitavit et multis ornamentis decoravit. Scripsit etiam inter cetera: Vitam S. Nicolai nostri Ordinis, versu heroico; de musica quoque varios dulci composuit modulamine cantus.

Moritur Clodiae, dum Bononia in patriam iter faceret, die 28 novembris 1514, suae aetatis anno 46, cuius corpus Veronam asportatum, ibidem in ecclesia nostra S. Euphemiae sepultum iacet. Ita Pamphilus in Chronico Ordinis, f. 104, quocum concordat Herrera, T, II, p. 195; sed Ossinger, p. 915 eidem Nicolao tribuit paternitatem alterius libelli, qui inscribitur: de Consolatione infirmorum, quem Herrera, et forsan verius eodem loco, p. 197 assignat alteri Nicolao Veronensi, qui floruit an. 1594, quique hoc anno facultatem obtinuit a Priore Generali illum edendi. Ex Codice Diplom. Maiocchi Casacca Vol. II, pp. 136, 340, colligitur Nicolaum Veronensem seniorem Papiae vitam duxisse ann. 1461, 1464 et 1495, 1496.