VICENTINUS CAESARIUS

 

 

 

Vicentinus Fr. Caesarius, S. Theol. Mag. concionator et theologus non spernendi nominis, an. 1538 erat praeceptor Iulii de Ruvere nepotis Summi Pontificis Iulii II. Capitulis Gen. non omnes patres vocales, praesertim exteri, tunc poterant interesse, ac propterea substituebantur a religiosis italis doctrina et morum gravitate insignioribus. Hinc evenit ut Caesarius noster pro absentibus interfuerit ut Discretus Cap. Generalibus an. 1543 Romae, et an. 1547 Recineti celebratis, et ut Definitor suae Provinciae Terrae Sanctae an. 1555 Comitiis etiam Gen. adfuerit in conventu Ariminensi. (Cfr. Analecta August., Vol. IX, pp. 123, 404). Iuxta P. Herrera, T. I, p. 151: "Cornelius de Placentia... et Caesarius Vicentinus, Illustrissini Cardinalis Madrucci theologus, praedicator et confessor, anno 1571 nonnulla opuscula ad posterorum memoriam divulgarunt". Lanteri vero in additamentis ad Crusenii Monasticon, p. 726 ait: "Decessit ex hac vita Viterbii an. 1560, quo se contulerat dum erat Suriani Prior"; sed hic annus emortualis, forsan ex errore typographi, clare videtur falsus; nam si anno 1571 erat adhuc inter vivos una cum Card. Madrucio, eius mors non est ponenda anno 1560. Nisi fallor Caesarius obiit an. 1580. Reliquit manu scripta opera:

1. Sermonum et concionum volumen, sed nescimus ubinam reperiri possit. Romae vero in Bibl. Angelica in cod. 377 (D. 2, 9), forsan autographum, p. 362, asservatur:

2. Fratris Caesarei Vicentini, Ordinis Eremitarum S. Augustini, in expositionem D. Landulfi Carthusiensis super Psalterium lucubratio, quam incoavit Venetiae, in aedibus D. Michaelis, 27 Augusti, et erat vigilia S. Patris nostri Augustini die veneris, hora 15, 1563. Inc.: "Recte admodum monet et praecipit Plato". Expl.: "Fr. Caesareus Vicentinus Eremita ludebat Vicentiae in aedib. D. Michaelis ultimissima novemb. 1562 multis aliis hunc nostrum laborem pretermittens".

 

 

 

Referenze:

Auctor praetermissus fuit a Gandolfo et ab Ossinger: Torelli de illo loquitur in Sec. Agost. T. VIII, p. 550 sub an. 1571.