ZUCCHI CAESAR AUGUSTINUS

 

 

 

Zucchi Fr Caesar Augustinus, Mediolanensis, S. Theol. Mag. a Philippo Argelati in Biblioth. Script. Mediolan., T. II, part. I, fol. 1705, dicitur vir amoenioribus litteris excultus et in philosophicis ac theologicis scientiis apprime versatus. An. 1660 mense maio in nostro Papiensi coenobio facultatem theologicam frequentans studii pro-magister declaratur.

Anno insequenti Florentiam ivit atque inde Recinetum, quo tempore et Lector, et Bacc. et studiorum Regens renuntiatus est. Papiam postea se contulit, et sub die 8 maii 1673 S. Theol. Mag. creatus fuit. Praedicavit interim sacram quadragesimam Veronae in nostra ecclesia S. Euphemiae, et an. 1674 Bononiae ad S. Iacobum; studiaque insuper tum Anconae cum Venetiis laudabiliter rexit, et an. 1680 Papiam iterum repetens, fit in ea publicus Universitatis professor philosophiae. Pluribus interfuit Capitulis Generalibus ceu Discretus aut Definitor, an. 1682 praefuit suae Insubricae provinciae, et an. 1685 fuit procurator Generalis electus; at post biennium, die 25 nov. 1687, animam exalavit. In nostra Bibliotheca Mediolani extabat eius Tractatus de anima, quem Romae die 21 iulii 1679 absolverat. Habetur praeterea eius Oratio in funere Rev.mi P. Magistri Thomae Pusterlae Inquisitoris Generalis Papiae, habita in templo D. Thomae PP. Praedicatorum. Mediolani, Typ. Antonii Malatestae, 1674. A nostrate Gandolpho laudatur etiam ob proesis latinae peritiam.

 

 

 

Referenze:

Ossinger, p. 980 et Lanteri, T., III, p. 134, et Maiocchi Casacca, Codex Diplomaticus Ord. Erem. S. Aug. Papiae, Vol. V. p. XV