BOLLINO IACOBUS

 

 

 

Bollino Fr. Iacobus, Mediolanensis, sacrae Theologiae Magister, dicitur a Philippo Argelati, Biblioth. Script. Mediolan. (Mediolani 1745) T. I, Part. II, p. 185: "vir eximiae majestatis et venerationis, ingentis animi, et maximae auctoritatis". Post studiorum curricula, sacrae Theologiae Doctor renunciatus fuit, et an. 1576 theologorum collegio Universitatis Ticinensis cooptatus (Cfr. Maiocchi-Casacca, Codex Diplom. Ord. S. Aug. Papiae, T. IV, p. 280). An. 1581 erat praeceptor Benedictinorum Mantuae. Paulo post eligitur Provincialis Prior in sua Insubrica provincia et, ut Provincialis, interfuit Capitulo Generali Romae an. 1587 celebrato ac inibi in suo munere confirmatus. Item, an. 1598 Generali Capitulo interfuit Romae uti suae Provinciae Definitor, et an. 1608 uti Discretus. Fuit et patrii coenobii ad S. Marcum Prior, et ab Ossinger, p. 137, in philosophicis ac theologicis disciplinis clarissimus dictus. Inter alia beneficia quae suo conventui largitus est, numerantur candelabra argentea, quae templo D. Marci donavit. Obiit an. 1610. Scripsit: 1. Tractatum de anima. 2. De elementorum formis. Uterque mss. in 4. asservabantur saec. XVIII in nostra Bibliotheca ad S. Marcum. 

 

 

 

Referenze:

Lanteri, Add. ad Crusenii Monasticon, T. I., p. 734. et in Prostr. saec sex, T. III, p. 160, nec non Analecta Aug., Vol. X, pp. 140, 276-302, et Ossinger, p. 137