BONI EGIDIO

 

 

 

Boni Fr. Aegidius, Blasii filius, nobilis Cortonensis, theologus magni nominis, concionator admodum clarus, et ecclesiastes insignis, an. 1330, ut ex bulla Ioannis XXII, extitit fundator coenobii Castilionis Florentini. An. 1339 erat Ticini in conventu S. P. Augustini S. Theol. Lector, ac inibi die 7 aprilis interfuit conventuali capitulo, quo, sub praesidentia Generalis Guillelmi de Cremona ad ordinem receptus fuit "nobilis vir dominus Marchus de Fano, civis et habitator Acquilegiensis". (Cfr. Maiocchi-Casacca, Codex Diplom. Ord. Erem. S. Aug. Papiae, 1905, T. I. p. 76). Ob sua egregia merita a Clemente VI, die 13 ianuarii an. 1348, Vicentinus Episcopus inauguratus fuit. An. 1355 a Carolo VI Imp. ad Pisanos legatus missus fuit, et ab Innocentio VI an. 1361 instante eodem Imperatore, tertia creatione mense septembris S. R. E. Cardinalis fuit designatus, sed non promulgatus. Conventui suo Cortonensi insignes reliquias donavit.

Nobilitatus itidem fuit legationibus aliis, nempe ad Hungariae regem Ludovicum I, ad Vicecomitem Bernabò pro dirimendis circa Bononiae dominationem controversiis, et ad alios Principes et Episcopos Germaniae. Tandem an. 1361 ex hac vita migravit. Laudatur ab Ughello, T. V., col. 1059, n° 52; a Gandolfo, p. 15; ab Ossinger, p. 147; a Moroni, Vol. 99, p. 224, et a Lanteri, Eremi Sacr. Aug., T. I, p. 190. Reliquit Aegidius noster, ait Gandolphus, tria volumina Theologica, quae olim asservabantur in Ducis Urbini Biblioteca, nunc autem in Vaticana, quae tamen non reperii.